ആരോഗ്യ മേളകളുടെയും ഏകാരോഗ്യ പദ്ധതി ജനകീയ ക്യാമ്പയിന്റെയും ജില്ലാതല ഉദ്ഘാടനം നടത്തി
ഇടുക്കി: പ്രകൃതി, മൃഗങ്ങൾ, മനുഷ്യൻ എല്ലാത്തിനെയും കൂട്ടിയോജിപ്പിച്ചു കൊണ്ടുള്ള ആരോഗ്യ നയത്തിനാണ് സർക്കാർ പ്രാധാന്യം കൊടുക്കുന്നതെന്ന് മന്ത്രി റോഷി അഗസ്റ്റിൻ പറഞ്ഞു. അടിമാലി ബ്ലോക്ക്തല ആരോഗ്യമേളയുടെ ഭാഗമായി ആരോഗ്യമേളകളുടെ ജില്ലാതല ഉദ്ഘാടനം ഓൺലൈനായി നിർവ്വഹിക്കുകയായിരുന്നു മന്ത്രി. പരിസ്ഥിതി, മൃഗാരോഗ്യം, മനുഷ്യാരോഗ്യം എന്നിവയുടെ സംയുക്ത പ്രവർത്തനം വഴിയാണ് സമ്പൂർണ്ണ ആരോഗ്യം എന്ന യാഥാർത്ഥ്യത്തിലേക്കെത്താൻ കഴിയൂ. ഈ സമീപനം വളർത്തി കൊണ്ട് വരേണ്ടത് ഏകാരോഗ്യം എന്ന പദ്ധതിയുടെ വിജയത്തിനും നമ്മുടെ നാടിന്റെ നിലനിൽപ്പിനും അനിവാര്യമാണെന്ന തിരിച്ചറിവ് ഏറ്റവും പ്രാധാന്യം അർഹിക്കുന്നു. മനുഷ്യന്റെയും മൃഗങ്ങളുടെയും ആരോഗ്യം പരിസ്ഥിതിയുമായി അടുത്ത് ബന്ധപ്പെട്ടിരിക്കുന്നുവെന്ന തിരിച്ചറിവാണ് നമുക്ക് സ്വീകരിക്കേണ്ടതായി വരുന്നത്. ഘട്ടംഘട്ടമായി എല്ലാ ജില്ലകളിലേക്കും ഏകാരോഗ്യം പദ്ധതി നടപ്പിലാക്കും. നിപ, കൊവിഡ് ഉൾപ്പെടെയുള്ള രോഗങ്ങളുടെ സാഹചര്യത്തിലാണ് ഇങ്ങനെയൊരു പഠനത്തിനും സമീപനത്തിലേക്കും വരാനായി കഴിഞ്ഞിട്ടുള്ളതെന്നും മന്ത്രി വ്യക്തമാക്കി. ഏകാരോഗ്യം പദ്ധതി ജനകീയ ക്യാമ്പയിന്റെ ഉദ്ഘാടനം അഡ്വ. ഡീൻ കുര്യാക്കോസ് എം.പി നിർവ്വഹിച്ചു. നാം ജീവിക്കുന്ന പ്രകൃതിക്ക് ആരോഗ്യം ഉണ്ടെങ്കിലെ നമുക്കും ആരോഗ്യം ഉണ്ടാകുവെന്ന് എം പി പറഞ്ഞു. സലുദ് ഫെസ്റ്റ്- 2022 എന്ന പേരിൽ അടിമാലി വിശ്വദീപ്തി പബ്ലിക് സ്‌കൂൾ ഓഡിറ്റോറിയത്തിലായിരുന്നു അടിമാലി ബ്ലോക്ക്തല ആരോഗ്യമേള സംഘടിപ്പിച്ചത്. അടിമാലി ഗ്രാമപഞ്ചായത്ത് ഗ്രൗണ്ടിൽ നിന്നാരംഭിച്ച ഇരുചക്രവാഹന റാലിയോടെയായിരുന്നു മേളക്ക് തുടക്കം കുറിച്ചത്. ഡെപ്യൂട്ടി ഡി.എം.ഒ ഡോ. സുഷമ പി.കെ റാലി ഫ്ളാഗ് ഓഫ് ചെയ്തു. റാലിക്ക് ശേഷം വിദ്യാർത്ഥികൾ അവതരിപ്പിച്ച ഫ്ളാഷ് മോബ് അരങ്ങേറി. അലോപ്പതി, ആയുർവ്വേദം, ഹോമിയോ വിഭാഗങ്ങളുടെ സ്റ്റാളുകളും എക്‌സിബിഷനുകളും സ്‌ക്രീനിംഗ് ക്യാമ്പുകൾക്കുമൊപ്പം ഇതരവകുപ്പുകളുടെ പ്രദർശനവും മേളയുടെ ഭാഗമായി ക്രമീകരിച്ചിരുന്നു. മേളയുടെ ഭാഗമായി ഒരുക്കിയ സിഗ്നേച്ചർ ക്യാമ്പയിനിൽ എം.പിയും എം.എൽ.എയും ജില്ലാ പഞ്ചായത്ത് പ്രസിഡന്റും ജില്ലാ കളക്ടറും ത്രിതല പഞ്ചായത്തംഗങ്ങളും പങ്ക് ചേർന്നു. ക്യാൻസർ നേരത്തെ അറിയാൻ, യോഗയും ഗർഭകാല പരിചരണവും, അപകടങ്ങളും സുരക്ഷയും തുടങ്ങി വിവിധ വിഷയങ്ങളിൽ മേളയോടനുബന്ധിച്ച് സെമിനാറുകൾ നടന്നു. ആദിവാസി വിഭാഗക്കാരുടെ നൃത്തരൂപമായ കൂത്തടക്കമുള്ള കലാപരിപാടികളും ഫുട്‌ബോൾ അടക്കമുള്ള കായികപ്രദർശന മത്സരങ്ങളും മേളയോടനുബന്ധിച്ച് അരങ്ങേറി. അഡ്വ. എ. രാജ എം.എൽ.എ അദ്ധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് ജിജി കെ. ഫിലിപ്പ് മുഖ്യാതിഥിയായി. ജില്ലാ കളക്ടർ ഷീബ ജോർജ്ജ് മുഖ്യപ്രഭാഷണം നടത്തി. അടിമാലി ബ്ലോക്ക് പഞ്ചായത്ത് പ്രസിഡന്റ് സോമൻ ചെല്ലപ്പൻ ആരോഗ്യ സന്ദേശം നൽകി. ഗ്രാമപഞ്ചായത്ത് പ്രസിഡന്റുമാരായ വി.ജി. പ്രതീഷ്‌കുമാർ, മഞ്ചു ബിജു, ബിജു കൃഷ്ണൻകുട്ടി, അടിമാലി ഗ്രാമപഞ്ചായത്ത് പ്രസിഡന്റിന്റെ അധികചുമതല വഹിക്കുന്ന സൗമ്യ അനിൽ, ജില്ലാ പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർമാൻ വി.എൻ. മോഹനൻ, ജില്ലാ പഞ്ചായത്തംഗങ്ങളായ സോളി ജീസസ്, അഡ്വ. എം. ഭവ്യ, ഷൈനി സജി, അടിമാലി ബ്ലോക്ക് പഞ്ചായത്തംഗങ്ങൾ, ഡെപ്യൂട്ടി ഡി.എം.ഒ സുഷമ പി.കെ തുടങ്ങിയവർ പങ്കെടുത്തു.