തൊടുപുഴ: പ്ലസ് ടു പരീക്ഷയിൽ ജില്ലയിൽ 81.43 ശതമാനം വിജയം. മുൻവർഷത്തെ അപേക്ഷിച്ച് ആറ് ശതമാനം കുറവാണിത്. 703 കുട്ടികൾ എല്ലാ വിഷയത്തിനും എ പ്ലസ് നേടി. വൊക്കേഷനൽ ഹയർ സെക്കൻഡറി (വി.എച്ച്.എസ്.സി) പരീക്ഷയിൽ 68.97 ശതമാനമാണ് വിജയം. പ്ലസ്ടുവിന് ജില്ലയിൽ 80 സ്‌കൂളുകളിൽ നിന്നായി പരീക്ഷ എഴുതിയ 10513 കുട്ടികളിൽ 8561 പേർ ഉപരിപഠനത്തിന് യോഗ്യത നേടി. ടെക്‌നിക്കൽ സ്‌കൂൾ വിഭാഗത്തിൽ 164 പേർ രജിസ്റ്റർ ചെയ്തതിൽ 158 പേരാണ് പരീക്ഷ എഴുതിയത്. ഇതിൽ 74 പേർ ഉപരിപഠനത്തിന് യോഗ്യത നേടി. 46 ശതമാനമാണ് വിജയം. ഇത്തവണ ഒരാൾ മാത്രമാണ് ടെക്‌നിക്കൽ സ്‌കൂളിൽ എല്ലാ വിഷയത്തിനും എ പ്ലസ് കരസ്ഥമാക്കിയത്. ഓപൺ സ്‌കൂൾ വിഭാഗത്തിൽ 342 പേർ രജിസ്റ്റർ ചെയ്തതിൽ 336 പേർ പരീക്ഷ എഴുതി. ഇതിൽ 175 പേർ ഉപരിപഠനത്തിന് യോഗ്യത നേടി. 52.08 ശതമാനമാണ് വിജയം. എട്ട് പേർ എല്ലാ വിഷയങ്ങൾക്കും എ പ്ലസ് കരസ്ഥമാക്കി. വൊക്കേഷനൽ ഹയർ സെക്കൻഡറി വിഭാഗത്തിൽ 1057 കുട്ടികൾ പരീക്ഷ എഴുതിയതിൽ 729 പേർ ഉപരിപഠനത്തിന് യോഗ്യത നേടിയത്.

ഒറ്റയാനായി അട്ടപ്പള്ളം ഇ.എം.എച്ച്.എസ്.എസ്

ജില്ലയിൽ കുമളി അട്ടപ്പള്ളം സെന്റ് തോമസ് ഇംഗ്ലീഷ് മീഡിയം ഹയർസെക്കൻഡറി സ്കൂളിന് മാത്രമാണ് നൂറ് ശതമാനം വിജയം നേടാനായത്. അൺ എയ്ഡഡ് സ്കൂളായ ഇവിടെ പരീക്ഷയെഴുതിയ 49 കുട്ടികളും വിജയിച്ചു.