 അരിക്കുഴ ഉദയ ലൈബ്രറിയിൽ മന്ത്രി റോഷി അഗസ്റ്റിൻ പ്രകാശനം ചെയ്യും

തൊടുപുഴ: അരിക്കുഴ ഉദയ വൈ.എം.എ ലൈബ്രറിയുടെ ആഭിമുഖ്യത്തിൽ പ്രസിദ്ധീകരിക്കുന്ന 'പെൺനിലം' ചെറുകഥാ സമാഹാരത്തിന്റെ പ്രകാശനം 26ന് ജലവിഭവ മന്ത്രി റോഷി അഗസ്റ്റിൻ നിർവഹിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. രാവിലെ 10ന് ലൈബ്രറി ഹാളിൽ നടക്കുന്ന സമ്മേളനത്തിൽ കാലടി സംസ്‌കൃത സർവ്വകലാശാല മുൻ വൈസ് ചാൻസലർ ഡോ. എം.സി. ദിലീപ്കുമാർ പുസ്തകം ഏറ്റുവാങ്ങും. സമ്മേളനത്തിൽ സ്റ്റേറ്റ് ലൈബ്രറി കൗൺസിൽ എക്‌സി. മെമ്പർ കെ.എം. ബാബു അദ്ധ്യക്ഷത വഹിക്കും. താലൂക്ക് ലൈബ്രറി കൗൺസിൽ സെക്രട്ടറി പി.കെ. സുകുമാരൻ, മണക്കാട് പഞ്ചായത്ത് പ്രസിഡന്റ് ടെസ്സി ജോബ്, ചെറുകഥാ സമാഹാരം എഡിറ്റർ രഞ്ജിത് ജോർജ്, കേരളകൗമുദി കോട്ടയം യൂണിറ്റ് ചീഫ് ആർ. ബാബുരാജ്, തൊടുപുഴ ബ്ലോക്ക് പഞ്ചായത്ത് അംഗം ജിജോ ജോർജ്, മണക്കാട് പഞ്ചായത്ത് വൈസ് പ്രസിഡന്റ് ഡോ. രോഷ്‌നി ബാബുരാജ്, പഞ്ചായത്ത് അംഗങ്ങളായ ടോണി കുര്യാക്കോസ്, എ.എൻ. ദാമോദരൻ നമ്പൂതിരി,​ ലൈബ്രറി സെക്രട്ടറി അനിൽ എം.കെ എന്നിവരും ചെറുകഥാ സമാഹാരത്തിലെ എഴുത്തുകാരും പ്രസംഗിക്കും. വാർത്താസമ്മേളനത്തിൽ ഉദയ ലൈബ്രറി സെക്രട്ടറി അനിൽ എം.കെ, ചെറുകഥാസമാഹാരം എഡിറ്റർ രഞ്ജിത് ജോർജ്, ലൈബ്രറി ഭരണസമിതി അംഗങ്ങളായ സുകുമാർ അരിക്കുഴ, കെ.ആർ. സോമരാജൻ എന്നിവർ പങ്കെടുത്തു.