കുമളി: . കുമളിയിൽ നടന്ന വനിതാകമ്മീഷൻ അദാലത്തിൽ കമ്മീഷൻ അംഗം ഷാഹിദ കമാൽ പങ്കെടുത്തു. കുമളിയിലും പരിസര പ്രദേശങ്ങളിലുമുള്ളവർക്ക് പ്രത്യേകമായിട്ടാണ് അദാലത്ത് സംഘടിപ്പിച്ചത്. പരാതിക്കാർക്ക് വന്ന് പോകുന്നതിന് സൗകര്യത്തിനായി ജില്ലയെ നാല് മേഖലകളാക്കി തിരിച്ചാണ് സിറ്റിങ് നടത്തുന്നത്.
കുമളി വ്യാപാര ഭവൻ ഹാളിൽ നടത്തിയ സിറ്റിങ്ങിൽ 35 കേസുകളാണ് പരിഗണിച്ചത്. കുടുംബ പ്രശ്‌നങ്ങൾ, വസ്തു തർക്കങ്ങൾ തുടങ്ങി വ്യത്യസ്ഥങ്ങളായ പരാതികളുണ്ടായിരുന്നു. ഇതിൽ വനിതാ കമ്മീഷന് ഇടപെടാവുന്ന വിഷയങ്ങളിലെ പരാതികൾ പരിഹരിച്ചു. കമ്മീഷന് പരിഹരിക്കാൻ പറ്റാത്ത പരാതികളുമായി എത്തിയവരെ വ്യക്തമായ നിയമോപദേശം നൽകി മടക്കിയയച്ചെന്നും കമ്മീഷൻ അംഗം ഷാഹിദ കമാൽ പറഞ്ഞു. സിറ്റിങ്ങിൽ 10 പരാതികൾ തീർപ്പാക്കി. 5 പരാതികളിൽ മറ്റു വകുപ്പുകളുടെ റിപ്പോർട്ട് ആവശ്യപ്പെട്ടിട്ടുണ്ട്. ഇത്തരം പരാതികൾ അടുത്ത സിറ്റിങ്ങിലേക്ക് മാറ്റിവച്ചു.