ആലക്കോട്: 20 വർഷംമുമ്പ് കാലപ്പഴക്കം മൂലം കണ്ടംചെയ്യണമെന്ന് കാണിച്ച് സർക്കാരിന് റിപ്പോർട്ട് നൽകി ദയാവധം കാത്തിരിക്കുന്ന പൊലീസ് ക്വാർട്ടേഴ്സുകൾ പൊളിച്ചുനീക്കി പുതിയവ നിർമ്മിക്കുന്നതിന് പകരം അനുവദിച്ചത് പുതിയ പൊലീസ് സ്റ്റേഷൻ കെട്ടിടം. ആലക്കോട് പൊലീസിനാണ് പുതിയ കെട്ടിടം ഒരുങ്ങുന്നത്.
അരനൂറ്റാണ്ട് മുമ്പ് വരെ ആലക്കോട് ടൗണിലെ വാടകക്കെട്ടിടത്തിൽ പ്രവർത്തിച്ചുവന്ന പൊലീസ് സ്റ്റേഷന് അരങ്ങത്ത് രണ്ടേക്കർ ഭൂമി സൗജന്യമായി ആലക്കോട് പി.ആർ. രാമവർമ്മരാജാ നൽകുകയായിരുന്നു. ഇവിടെ പുതിയ പൊലീസ് സ്റ്റേഷൻ കെട്ടിടവും പൊലീസ് ക്വാർട്ടേഴ്സുകളും നിർമ്മിച്ചു.

ഓരോ കെട്ടിടത്തിലും രണ്ട് കുടുംബങ്ങൾക്ക് താമസിക്കാവുന്ന വിധത്തിലുള്ള 6 ക്വാർട്ടേഴ്സുകളും എസ്.ഐക്ക് താമസിക്കുന്നതിനായി മറ്റൊരു ക്വാർട്ടേഴ്സുമാണ് നിർമ്മിച്ചത്. ആലക്കോട് സ്റ്റേഷനിൽ ജോലി ചെയ്യുന്ന പൊലീസുകാർക്കും എസ്.ഐമാർക്കും അക്കാലത്ത് ഈ ക്വാർട്ടേഴ്സുകൾ വളരെ അനുഗ്രഹമായിരുന്നു. ഇഷ്ടികയും മരവുമുപയോഗിച്ച് നിർമ്മിച്ച ഓടുമേഞ്ഞ ഈ ക്വാർട്ടേഴ്സുകൾ കാലപ്പഴക്കം മൂലം ചോർന്നൊലിക്കുകയും ചിതലരിച്ച് കെട്ടിടങ്ങൾ നിലംപൊത്താൻ തുടങ്ങുകയും ചെയ്തതോടെ പൊലീസുകാർ പ്രാണരക്ഷാർഥം മാറിത്താമസിക്കുകയായിരുന്നു. ഈ ക്വാർട്ടേഴ്സുകൾ കണ്ടംചെയ്ത് പുതിയ കെട്ടിടം നിർമ്മിക്കണമെന്നുള്ള റിപ്പോർട്ട് രണ്ട് പതിറ്റാണ്ട് മുമ്പുതന്നെ പൊലീസ് ഹെഡ് ക്വാർട്ടേഴ്സിലെത്തിയതാണെങ്കിലും സാങ്കേതികത്വം പറഞ്ഞ് നീട്ടിക്കൊണ്ടുപോകുകയാണത്രെ ചെയ്യുന്നത്. പൊലീസ് ക്വാർട്ടേഴ്സിനൊപ്പം നിർമ്മിച്ച പൊലീസ് സ്റ്റേഷൻ കെട്ടിടത്തിനുപകരം പുതിയ കെട്ടിടം നിർമ്മിക്കുകയും 15 വർഷം മുമ്പുതന്നെ അന്നത്തെ മുഖ്യമന്ത്രി ഉമ്മൻചാണ്ടി ഉദ്ഘാടനം നിർവ്വഹിക്കുകയും ചെയ്തതാണ്. ആലക്കോട് പൊലീസ് സ്റ്റേഷനെ സർക്കിൾ ഓഫീസായി ഉയർത്തുകയും ഈ ബഹുനില കെട്ടിടത്തിന്റെ മുകൾനില സർക്കിൾ ഓഫീസറായി പ്രവർത്തിച്ചുവരികയുമാണ്. പൊലീസ് ക്വാർട്ടേഴ്സുകൾ നിലംപൊത്തിയതിനാൽ സ്ഥലംമാറിവരുന്ന പൊലീസ് ഉദ്യോഗസ്ഥർ വാടകകെട്ടിടം തേടി അലയേണ്ട ഗതികേടിലാണുള്ളത്. വനിതാ പൊലീസുകാർ ഉൾപ്പെടെ നൈറ്റ് ഡ്യൂട്ടിക്കെത്തുന്നവർക്ക് തലചായ്ക്കാൻ പോലും നിർവ്വാഹമില്ല. അതിനിടെയാണ് പൊലീസ് സ്റ്റേഷൻ വളപ്പിൽ പുതിയ കെട്ടിടം നിർമ്മാണം ആരംഭിച്ചിരിക്കുന്നത്.

ക്വാർട്ടേഴ്സ് ഇഴജന്തുക്കൾക്ക് സ്വന്തം!

നാൽപ്പതോളം പൊലീസുകാർ ജോലിചെയ്യുന്ന ഈ സ്റ്റേഷനിൽ പ്രാഥമിക ആവശ്യങ്ങൾക്കു പോലും ബുദ്ധിമുട്ടുകയാണ്. പൊലീസ് ക്വാർട്ടേഴ്സ് നിർമ്മിക്കണമെന്നുള്ള ദീർഘകാലമായുള്ള ആവശ്യം കണ്ടില്ലെന്ന് നടിച്ചുകൊണ്ടാണ് പൊലീസ് സ്റ്റേഷന് പുതിയ കെട്ടിടനിർമ്മാണം ആരംഭിച്ചിരിക്കുന്നത്. തകർന്നുകിടക്കുന്ന പഴയ പൊലീസ് ക്വാർട്ടേഴ്സുകൾ ഇഴജന്തുക്കളുടെ താവളമാണിപ്പോൾ. എത്രയും വേഗം ഈ ക്വാർട്ടേഴ്സുകൾ പൊളിച്ചുനീക്കി പുതിയ ക്വാർട്ടേഴ്സ് നിർമ്മിക്കണമെന്നാണ് ആവശ്യം.