കാസർകോട്: പയസ്വിനി പുഴ കടന്നെത്തി കാർഷിക വിളകൾ നശിപ്പിക്കുന്ന കാട്ടാനയുടെ ഭീഷണി നേരിടുന്ന മലയോരത്തെ കർഷക കുടുംബങ്ങളെ എൻ.സി.പി പ്രതിനിധി സംഘം സന്ദർശിച്ചു. മൂന്ന് മാസങ്ങളായി കൊമ്പനാനയുടെയും മറ്റ് രണ്ടാനകളുടെയും ശല്യം രൂക്ഷമായ മുളിയാർ റിസർവ് വനത്തിന് സമീപം താമസിക്കുന്ന കുടുംബങ്ങളുടെ ദുരിതം നേരിട്ടറിയാനും സർക്കാരിന്റെ ശ്രദ്ധയിൽപ്പെടുത്തി പരിഹാരം ഉണ്ടാക്കുന്നതിനുള്ള ശ്രമത്തിന്റെ ഭാഗമായാണ് ജില്ലാ ഭാരവാഹികൾ അടങ്ങിയ സംഘം കർഷകരെ കാണാനെത്തിയത്.

കാർഷിക വിളകൾ നശിപ്പിച്ച ഇരിയണ്ണി ടീയടുക്കം, അരിയിൽ, ചെറ്റത്തോട്, ദർഘാസ്, വളപ്പാറ തുടങ്ങിയ സ്ഥലങ്ങളിൽ എത്തിയ സംഘം ആന നശിപ്പിച്ച തോട്ടങ്ങളും കണ്ടു. ആനക്കാര്യം വാട്സ്ആപ് കൂട്ടായ്മ കൺവീനറും മുൻ പഞ്ചായത്ത് മെമ്പറുമായ പ്രഭാകരൻ, കൃഷ്ണൻ നായർ, ഗോപാലകൃഷ്ണൻ, പുഷ്പ എന്നിവർ ദുരിതങ്ങൾ വിവരിച്ചു. എൻ.സി.പി ജില്ലാ വൈസ് പ്രസിഡന്റ് ഒ.കെ ബാലകൃഷ്ണൻ, ജില്ലാ ജനറൽ സെക്രട്ടറി ജോൺ ഐമൺ, എൻ.വൈ.സി ജില്ലാ പ്രസിഡന്റ് സി.വി വസന്തകുമാർ, ഉദുമ ബ്ലോക്ക് പ്രസിഡന്റ് ടി. മത്തായി, ഷെഫീഖ് ഷംനാട്. സതീശൻ പുതുച്ചേരി, ഇ. ചന്ദ്രൻ, എം. മനോജ് കുമാർ, കെ. അഖിൽ തുടങ്ങിയവർ സംഘത്തിൽ ഉണ്ടായിരുന്നു. തുടർന്ന് കാസർകോട് ഡി.എഫ്.ഒ പി. ബിജു, മുളിയാർ ഫോറസ്റ്റ് ഓഫീസർ എൻ.വി സത്യൻ എന്നിവരുമായി ഇവർ ചർച്ച നടത്തി.

കർഷകരുടെയും വനപാലകരുടെയും പ്രശ്നങ്ങൾ വനംവകുപ്പ് മന്ത്രി എ.കെ ശശീന്ദ്രനെ നേരിൽ കണ്ടു ബോധ്യപ്പെടുത്തി പരിഹാരം ഉണ്ടാക്കാൻ ശ്രമിക്കും.

ജോൺ ഐമൺ (എൻ.സി.പി ജില്ലാ ജനറൽ സെക്രട്ടറി)