മാവൂർ: മാവൂർ ഗ്രാമപഞ്ചായത്തിലെ കോട്ടാംപറമ്പ് പട്ടികജാതി കോളനി നവീകരണത്തിന് പദ്ധതി ആവിഷ്കരിക്കാനുള്ള നടപടികൾക്ക് തുടക്കമായി. അംബേദ്കർ ഗ്രാമം പദ്ധതിയിൽ ഉൾപ്പെടുത്തി സംസ്ഥാന സർക്കാർ അനുവദിച്ച ഒരു കോടി രൂപ ചെലവിലാണ് കോളനിയിൽ വികസന പ്രവർത്തനങ്ങൾ നടത്തുന്നത്. കോളനി വാസികളുടെ യോഗം പി.ടി.എ റഹീം എം.എൽ.എ ഉദ്ഘാടനം ചെയ്തു. കുടിവെള്ളം, ശ്മശാന നവീകരണം, റോഡ് പരിഷ്കരണം തുടങ്ങിയ പൊതുവായ വികസന പ്രവർത്തനങ്ങൾക്ക് മുൻഗണന നൽകിക്കൊണ്ടുള്ള പദ്ധതികളാണ് കോളനിയിൽ നടത്താൻ തീരുമാനിച്ചത്. മാവൂർ ഗ്രാമപഞ്ചായത്ത് പ്രസിഡന്റ് പുലപ്പാടി അദ്ധ്യക്ഷത വഹിച്ചു. പട്ടികജാതി വികസന ഓഫീസർ ടി.എം മുകേഷ് പദ്ധതി വിശദീകരിച്ചു. വാർഡ് മെമ്പർ രജിത സുരേന്ദ്രൻ, മുൻ മെമ്പർമാരായ സുരേഷ് പുതുക്കുടി, കെ ഗോപാലൻ, കേരള ഇലക്ട്രിക്കൽ ആൻഡി അലൈഡ് എൻജിനീയറിംഗ് കമ്പനി എൻജിനീയർ പി.എം അബ്ദുൽ സത്താർ, നിർവഹണ ഏജൻസി പ്രതിനിധി കെ.ടി അസീസ്, കെ.കെ സോമൻ, കെ സുനോദ്കുമാർ, എൻ ഗിരീഷ്, കെ ശാരദ എന്നിവർ പ്രസംഗിച്ചു.