മുണ്ടക്കയം : മുണ്ടക്കയത്തും പരിസരപ്രദേശങ്ങളിലും ചിതറിക്കിടക്കുന്ന സർക്കാർ ഓഫീസുകൾ ഒരു മേൽക്കൂരയ്ക്ക് കീഴിൽ എത്തിക്കുന്നതിനും, അതുവഴി മെച്ചപ്പെട്ട സർക്കാർ സേവനങ്ങൾ ഉറപ്പുവരുത്തുന്നതിനും ഉദ്ദേശിച്ച് മുണ്ടക്കയത്ത് എം.എൽ.എ ആസ്തി വികസന ഫണ്ട് ഉപയോഗിച്ച് മിനി സിവിൽ സ്റ്റേഷൻ നിർമിക്കുമെന്ന് അഡ്വ.സെബാസ്റ്റ്യൻ കുളത്തുങ്കൽ അറിയിച്ചു. മുണ്ടക്കയം പുത്തൻചന്തയിൽ പഞ്ചായത്തിന്റെ അധീനതയിലുള്ള സ്ഥലത്താണ് സിവിൽ സ്റ്റേഷൻ സ്ഥാപിക്കുക. മുണ്ടക്കയം സബ് ട്രഷറി, ഐ.സി.ഡി.എസ് ഓഫീസ്, മുണ്ടക്കയം കൃഷിഭവൻ, ഗവ.വെറ്റിനറി പോളി ക്ലിനിക്, ഗവ.ഹോമിയോ ആശുപത്രി, വാട്ടർ അതോറിറ്റി സെക്ഷൻ ഓഫീസ്, ഇലക്ട്രിസിറ്റി ബോർഡ് സെക്ഷൻ ഓഫീസ് എന്നീ ഓഫീസുകളാണ് മിനി സിവിൽ സ്റ്റേഷനിലേക്ക് മാറ്റുന്നതിന് ഇപ്പോൾ ഉദ്ദേശിക്കുന്നത്. ഇതുകൂടാതെ കോൺഫറൻസ് ഹാൾ, പൊതുജനങ്ങൾക്ക് വിശ്രമമുറി, തുടങ്ങി അനുബന്ധ സൗകര്യങ്ങളും, കൂടാതെ ഭാവിയിലേക്ക് പുതിയ ഓഫീസുകൾ സ്ഥാപിക്കപ്പെടുന്ന പക്ഷം അവയ്ക്ക് കൂടിയുള്ള സൗകര്യങ്ങൾ സജ്ജമാക്കി മിനി സിവിൽ സ്റ്റേഷൻ രൂപകല്പന ചെയ്യുന്നതിന് ഉദ്ദേശിക്കുന്നതായും എം.എൽ.എ അറിയിച്ചു. പ്ലാനും എസ്റ്റിമേറ്റും തയ്യാറാക്കുന്നതിന് പൊതുമരാമത്ത് കെട്ടിട വിഭാഗം അസിസ്റ്റന്റ് എക്സിക്യൂട്ടീവ് എൻജിനിയർ, അസിസ്റ്റന്റ് എൻജിനിയർ എന്നിവരെ ചുമതലപ്പെടുത്തി. പ്രവർത്തനങ്ങൾ ഏകോപിപ്പിക്കുന്നതിന് തഹസിൽദാർക്ക് നിർദ്ദേശം നൽകി. സ്ഥലലഭ്യത ഉൾപ്പെടെ ആവശ്യമായ ഇതര ക്രമീകരണങ്ങൾ മുണ്ടക്കയം ഗ്രാമപഞ്ചായത്തിന്റെ നേതൃത്വത്തിൽ നടപ്പിലാക്കും.