വൈക്കം : ലോകത്താകെയുള്ള കേരളീയരുടെ കൂട്ടായ്മയായ ലോക കേരള സഭയിൽ ഇടം നേടി മറവൻതുരുത്ത് സ്വദേശിയും. മുംബൈയിൽ വ്യവസായ പ്രമുഖനായ വി.കെ മുരളീധരനാണ് നാടിന് അഭിമാനമായി മാറിയത്. വി കെ എം ഗ്രൂപ്പ് ഉടമയും പ്രമുഖ സീ ഫുഡ് എക്‌സ്‌പോർട്ടറും റോയൽ റെസ്​റ്റോയി ഹോട്ടൽ ശൃംഖലകളുടെ ഉടമയുമാണ് മുരളീധരൻ. ദീർഘകാലമായി മുംബൈയിലും ഗുജറാത്തിലുമായി ബിസിനസ് ചെയ്തുവരികയാണ് ഇദ്ദേഹം. മലയാളി അസോസിയേഷനടക്കം വിവിധ സംഘടനകളുടെ നേതൃപദവി അലങ്കരിക്കുന്നുണ്ട്. കേരളത്തിൽ വലിയ പദ്ധതികൾ നടപ്പിലാക്കുന്നതിന്റെ ഭാഗമായി ചർച്ചകൾ നടക്കുന്നതിനിടെയാണ് ലോക കേരള സഭയിലേക്ക് തിരഞ്ഞെടുക്കുന്നത്. പ്രളയത്തിലും , കൊവിഡ് മഹാമാരി സമയത്തും മറവൻതുരുത്തിന് സഹായവുമായി എത്തിയിരുന്നു. ലോക് ഡൗൺ കാലത്ത് അഭയത്തിന്റെ നേതൃത്വത്തിൽ ഭക്ഷണ പൊതികൾ വിതരണം ചെയ്തപ്പോൾ മുരളീധരന്റെ ഉടമസ്ഥതയിലുള്ള പുഴയോരം ഹോട്ടലിന്റെ അടുക്കള പൂർണമായും വിട്ടുനൽകിയിരുന്നു. ജീവകാരുണ്യ പ്രവർത്തനങ്ങളും നടത്തുന്നുണ്ട്.