കോട്ടയം: ഡൽഹിയിൽ ന‌ടന്ന യോഗ ഒളിമ്പ്യാഡിൽ സ്വർണ മെഡൽ കരസ്ഥമാക്കി എരുമേലി സ്വദേശിനിയായ രേവതി രാജേഷ് കേരളത്തിന് അഭിമാനമായി. വെൺകുറിഞ്ഞി എസ്.എൻ.ഡി.പി ഹയർ സെക്കൻഡറി സ്‌കൂളിലെ പത്താംക്ലാസ് വിദ്യാർത്ഥിനിയാണ് രേവതി. മലയോര മേഖലയിലെ പിന്നോക്കാവസ്ഥയുടെ പരിമിതികളെ മറികടന്ന് പാഠ്യ പാഠ്യേതര പ്രവർത്തനങ്ങളിൽ ഉജ്ജ്വല നേട്ടം കൈവരിക്കാൻ സ്കൂളിനും കഴിഞ്ഞു . 2019 ൽ ഡൽഹിയിൽ നടന്ന ദേശീയ യോഗ ഒളിമ്പ്യാഡിൽ വെങ്കലം നേ‌ടിയ രേവതി ഇക്കുറി അത് സ്വർണ്ണത്തിളക്കത്തിലേക്കെത്തിക്കുകയായിരുന്നു. 2017, 2018, 2019 വർഷങ്ങളിൽ ദേശീയ സ്‌കൂൾ ഗെയിംസിലും പങ്കെടുത്തിട്ടുണ്ട്.

2016ലാണ് ആദ്യമായി കേരളത്തെ പ്രതിനിധാനം ചെയ്ത് ഒരു കുട്ടി ദേശീയ യോഗ ഒളിമ്പ്യാഡിൽ പങ്കെ‌ടുക്കുന്നത്. വെൺകുറിഞ്ഞി സ്കൂളിലെ തന്നെ മനു മനോജായിരുന്നു അത്. 2019ൽ രേവതിയോടൊപ്പം ഈ വിദ്യാലയത്തിലെ ശിവലാൽ ബാബുവും കേരളത്തിനെ പ്രതിനിധാനം ചെയ്തു. ഇക്കുറി എക്കാലത്തേയും തിളക്കമാർന്ന വിജയം കരസ്ഥമാക്കിയ രേവതി എരുമേലി ചെമ്പകപ്പാറ സ്വദേശികളായ രാജേഷ്- രാജി ദമ്പതികളുടെ മകളാണ്. സഹോദരൻ എട്ടാം ക്ലാസ് വിദ്യാർത്ഥി രാഹുൽ.

2016 മുതൽ യോഗ പരിശീലനത്തിലും യോഗ ഏറോബിക്‌സിലും വെൺകുറിഞ്ഞി എസ്.എൻ.ഡി.പി ഹയർ സെക്കൻഡറി സ്കൂൾ കുട്ടികൾക്ക് പ്രത്യേക പരിശീലനം നൽകുന്നുണ്ട്. സംസ്ഥാന,ദേശീയ,അന്തർദേശീയ മത്സരങ്ങളിൽ കുട്ടികളെ പങ്കെടുപ്പിക്കാനും ശ്രദ്ധിക്കുന്നു. കായികാദ്ധ്യാപിക എസ്. റെജിയാണ് പരിശീലനം നൽകുന്നത്.