കൊടുങ്ങൂർ: വാഴൂർ 110 കെ.വി സബ്‌സ്റ്റേഷൻ പ്രാവർത്തികമാക്കുന്നതിനുള്ള നടപടികൾ അന്തിമഘട്ടത്തിലേക്ക് കടന്നതായി ഗവ.ചീഫ് വിപ്പ് ഡോ.എൻ.ജയരാജ് അറിയിച്ചു. 2023 മാർച്ചിൽ നിർമ്മാണം പൂർത്തിയാക്കുകയാണ് ലക്ഷ്യം. പുതുക്കിയ എസ്റ്റിമേറ്റ പ്രകാരം 15.2 കോടി രൂപയാണ് സബ് സ്‌റ്റേഷനുള്ള നിർമ്മാണ ചെലവ് കണക്കാക്കിയിരിക്കുന്നത്. വൈദ്യുതി വകുപ്പിന്റെയും റവന്യൂ വകുപ്പിന്റെയും ഭരണാനുമതികൾ നേരത്തെ ലഭിച്ചിരുന്നു. കാഞ്ഞിരപ്പള്ളി മണ്ഡലത്തിലെ വാഴൂർ, പള്ളിക്കത്തോട് പഞ്ചായത്തുകളിലെ വോൾട്ടേജ് ക്ഷാമം പരിഹരിക്കുന്നതും തടസരഹിത വൈദ്യുതി വിതരണവുമാണ് പദ്ധതിയിലൂടെ ലക്ഷ്യമിടുന്നത്. നിലവിൽ വൈദ്യുതി എത്തുന്നത് പാമ്പാടി, കാഞ്ഞിരപ്പള്ളി സബ്‌സ്റ്റേഷനുകളിൽ നിന്നാണ്. പുതിയ സബ്‌സ്റ്റേഷന് അനുയോജ്യമായ 125 സെന്റ് സ്ഥലം വാഴൂരാണ് കണ്ടെത്തിയിരിക്കുന്നത്. സ്ഥലമേറ്റെടുപ്പ് പൂർത്തിയാക്കി ടെണ്ടർ നടപടികളിലേക്ക് കടന്നതായും ചീഫ് വിപ്പ് അറിയിച്ചു.