വിമർശനങ്ങൾ ശ്രദ്ധയിൽപെട്ടു കഴിഞ്ഞാൽ ഉടനടി പരിഹാരം ഉണ്ടാക്കാൻ ശ്രമിക്കുന്നയാളാണ് പൊതുമരാമത്ത്- ടൂറിസം വകുപ്പ് മന്ത്രി പി.എ മുഹമ്മദ് റിയാസ്. ജനങ്ങൾക്ക് ബുദ്ധിമുട്ടുണ്ടാകുന്ന തരത്തിലുള്ള സ്ഥിതി വിശേഷം തന്റെ വകുപ്പുകളിൽ ഉണ്ടാകാതിരിക്കാൻ റിയാസ് പരാമവധി ശ്രദ്ധിക്കാറുമുണ്ട്. ഇപ്പോഴിതാ അത്തരത്തിലൊന്ന് ശ്രദ്ധയിൽ പെട്ടപ്പോൾ തന്നെ പരിഹാരത്തിന് നിർദേശിച്ചിരിക്കുകയാണ് മന്ത്രി.
ടൂറിസം വകുപ്പിന് കീഴിലുള്ള കെടിഡിസി ഹോട്ടലുകളിൽ മൺസൂർ ഓഫർ ആരംഭിക്കുന്നത് സംബന്ധിച്ച് മന്ത്രി പങ്കുവച്ച ഫേസ്ബുക്ക് കുറിപ്പിന് താഴെ തിരുവനന്തപുരത്തെ മൃഗശാല പരിസരത്തെ കാന്റീനിന്റെ വൃത്തിയില്ലായ്‌മ ഒരാൾ ചൂണ്ടിക്കാട്ടിയിരുന്നു. പേയ്‌‌മെന്റിന് കാർഡോ, ഗൂഗിൾ പേയോ ഇല്ലെന്നും, ഫുഡും മോശമാണെന്നുമായിരുന്നു പരാതി. ഇതിന് മന്ത്രിയുടെ മറുപടിയും ഉടനെ വന്നു. പ്രശ്നം കെടിഡിസി എംഡിയെ അറിയിച്ചിട്ടുണ്ടെന്നും ഉടൻ പരിഹരിക്കപ്പെടുമെന്നും മന്ത്രി ഉറപ്പു നൽകി.
മൺസൂർ ഓഫറുമായി ടൂറിസം വകുപ്പ്
തിരുവനന്തപുരം: കേരളത്തിലെ ഏറ്റവും വലിയ ഹോട്ടൽ ശൃംഖലയായ കേരള ടൂറിസം ഡെവലപ്പ്‌മെന്റ് കോർപ്പറേഷൻ സംസ്ഥാനത്തെ പ്രധാന ടൂറിസം കേന്ദ്രങ്ങളിൽ കുറഞ്ഞ ചെലവിൽ കുടുംബസമേതം സന്ദർശിക്കാൻ മൺസൂൺ പാക്കേജുകൾ ഒരുക്കും. മികച്ച ആനുകൂല്യങ്ങളുമായി ജൂൺ 1 മുതൽ സെപ്തംബർ 30 വരെയാണിത്.
തേക്കടി, മൂന്നാർ, പൊന്മുടി, കുമരകം, കൊച്ചി എന്നിവിടങ്ങളിലെ കെ.ടി.ഡി.സി റിസോർട്ടുകളിലാണിത്. കെ.ടി.ഡി.സിയുടെ പ്രീമിയം ഡെസ്റ്റിനേഷൻ റിസോർട്ടുകളായ തിരുവനന്തപുരത്തെ മസ്‌കറ്റ് ഹോട്ടൽ, തേക്കടിയിലെ ആരണ്യനിവാസ്, കുമരകത്തെ വാട്ടർ സ്‌കേപ്സ്, മൂന്നാറിലെ ടീ കൗണ്ട്, കൊച്ചിയിലെ ബോൾഗാട്ടി പാലസ് എന്നിവിടങ്ങളിൽ രണ്ട് രാത്രിയും മൂന്നുദിവസത്തെ താമസവും പ്രഭാതഭക്ഷണവും നികുതിയും ഉൾപ്പെടെ 12 വയസിൽ താഴെയുള്ള രണ്ട് കുട്ടികൾക്ക് 7499 രൂപയാണ് നിരക്ക്.
കൂടാതെ ബഡ്ജറ്റ് ഡെസ്റ്റിനേഷൻ റിസോർട്ടുകളായ തേക്കടിയിലെ പെരിയാർ ഹൗസ്, തണ്ണീർമുക്കത്തെ സുവാസം, കുമരകം ഗേറ്റ്‌വേ റിസോർട്ട്, പൊൻമുടിയിലെ ഗോൾഡൻ പീക്ക്, മലമ്പുഴയിലെ ഗാർഡൻ ഹൗസ്, എന്നിവയിൽ രണ്ട് രാത്രി, മൂന്നുദിവസത്തെ താമസം, പ്രഭാതഭക്ഷണം, നികുതിയും ഉൾപ്പെടെ 4,999 രൂപ നിരക്കാണ്.
ഇത് കൂടാതെ നിലമ്പൂരിലെയും മണ്ണാർക്കാട്ടെയും ടാമറിന്റ് ഈസി ഹോട്ടലുകളിൽ രണ്ട് രാത്രിയും മൂന്നുദിവസവും താമസിക്കാൻ പ്രഭാതഭക്ഷണവും, നികുതികളും ഉൾപ്പെടെ 3499 രൂപയാണ്. ഓണക്കാലത്ത് മൺസൂൺ പാക്കേജുകൾ ഇല്ല. വെള്ളി, ശനി, മറ്റു അവധി ദിവസങ്ങളിൽ പൊൻമുടിയിലെ ഗോൾഡൻ പീക്കിലും ഈ പാക്കേജ് ലഭ്യമല്ല.
കൂടുതൽ വിവരങ്ങൾക്ക് www.ktdc.com/packages സന്ദർശിക്കുക. ഫോൺ: 0471 2316736, 2725213, 9400008585.