കൗമാരപ്രായത്തിൽ ലൈംഗികമായി ദുരുപയോഗം ചെയ്യപ്പെട്ടുവെന്ന വെളിപ്പെടുത്തലുമായി നടി. സേക്രഡ് ഗെയിംസ് വെബ് സീരീസിലെ നടിയാണ് പതിനേഴാമത്തെ വയസിൽ താൻ നേരിട്ട ദുരനുഭവത്തെക്കുറിച്ച് തുറന്നുപറഞ്ഞത്. തന്റെ പുതിയ പുസ്തകത്തിലൂടെയാണ് നടിയുടെ വെളിപ്പെടുത്തൽ.

ഒരു കുടുംബ സുഹൃത്ത് തന്നെ ദുരുപയോഗം ചെയ്‌തെന്നാണ് പുസ്തകത്തിൽ പറയുന്നത്. 'X' എന്നാണ് ഇയാളെ നടി വിശേഷിപ്പിക്കുന്നത്. വർഷങ്ങൾക്ക് ശേഷമാണ് താൻ സഹിച്ച കാര്യങ്ങൾ അമ്മയോട് പറയാൻ കഴിഞ്ഞതെന്ന് നടി വ്യക്തമാക്കി.

'പതിനേഴാമത്തെ വയസിലാണ് ജീവിതത്തിലെ ഏറ്റവും വലിയ ദുരന്തം നേരിട്ടത്. കുടുംബവുമൊത്ത് പതിവായി ഒരു റസ്റ്റോറന്റിൽ പോകുമായിരുന്നു. ഈ സ്ഥാപനത്തിന്റെ ഉടമയാണ് 'X'. അയാൾ പിന്നെ കുടുംബ സുഹൃത്തും വിശ്വസ്തനുമായി മാറി. കുടുംബത്തിന്റെ അവസ്ഥയറിഞ്ഞ് സാമ്പത്തിക സഹായം ചെയ്തിട്ടുണ്ട്.

ആ സഹായത്തിന് ശേഷം അയാളെന്നെ ദുരുപയോഗം ചെയ്യാൻ തുടങ്ങി. അങ്കിൾ എന്ന് വിളിക്കരുതെന്ന് പറഞ്ഞു. ഒരിക്കൽ ഞാൻ ഇരുന്ന കാറിന്റെ പിൻസീറ്റിലേക്ക് അയാളുടെ കൈ വന്നു. എന്റെ ഡ്രസ് മാറ്റി, തുടയിൽ തടവി...

അയാൾ ഞങ്ങളുടെ വീട്ടിലെ സ്ഥിരം സന്ദർശകനായിരുന്നു. മമ്മ അയാൾക്കൊപ്പം സമയം ചെലവഴിക്കുകയും, അയാൾക്കുവേണ്ടി പാചകം ചെയ്യുകയും ചെയ്യും. ഒരിക്കൽ മമ്മയുടെ മുന്നിൽ വച്ച് എന്റെ കവിളിൽ ചുംബിച്ചു, 'നീ എന്റെ പ്രിയപ്പെട്ട കുട്ടിയാണ്' എന്ന് പറഞ്ഞു. അസ്വസ്ഥതയുണ്ടെങ്കിലും ഞാൻ മിണ്ടാതെ നിന്നു.

ഒരു ദിവസം ഹോട്ടലിലേക്ക് കൊണ്ടുപോയി. ചുണ്ടിൽ ചുംബിക്കുന്നതിന് മുമ്പ് മുഖത്ത് തലോടി. ആ ഹോട്ടലിൽവച്ചാണ് ആദ്യമായി പീഡനം നടന്നത്. പീഡനത്തെക്കുറിച്ച് പറഞ്ഞാൽ കുടുംബം നശിപ്പിക്കുമെന്ന് ഭീഷണിപ്പെടുത്തി."- എന്നാണ് പുസ്തകത്തിൽ പറയുന്നത്.