മൂന്നാർ: മൂന്നാർ നല്ലതണ്ണി എസ്റ്റേറ്റ് കുറുമല ഡിവിഷനിൽ കാടിറങ്ങിയ പുലി പശുവിനെ കൊന്നു. ദിവസവും പത്ത് ലിറ്ററോളം പാൽ തന്നിരുന്ന പശുവാണ് പുലിയുടെ ആക്രമണത്തിൽ കൊല്ലപ്പെട്ടത്. കുറുമല ഡിവിഷനിലെ വാസുവാണ് പശുവിന്റെ ഉടമ. കഴിഞ്ഞ കുറച്ച് മാസങ്ങൾക്കിടെ അറുപതിലേറെ കന്നുകാലികളാണ് പുലിയുടെ ആക്രമണത്തിന് ഇരയായത്.

കഴിഞ്ഞ ദിവസം വൈകിട്ട് ആറരയോടെ പശുവിന്റെ കരച്ചിൽ കേട്ട് നോക്കിയപ്പോഴാണ് പുലി ആക്രമിക്കുന്നത് കണ്ടത്. ഈ സമയം പ്രദേശത്ത് കനത്ത മുടൽ മഞ്ഞ് ഉണ്ടായിരുന്നതിനാല്‍ പശുവിനെ രക്ഷിക്കാനായി അടുത്തേയ്ക്ക് പോകാൻ പറ്റാത്ത അവസ്ഥയിലായിരുന്നെന്നും ബഹളം വച്ച് പുലിയെ തുരത്തിയെങ്കിലും പശുവിന്‍റെ ജീവൻ നഷ്ടമായെന്നും വാസു പറഞ്ഞു. നല്ലതണ്ണി എസ്റ്റേറ്റ് കുറുമല ഡിവിഷനിൽ അഞ്ചാമത്തെ പശുവിനെയാണ് പുലി അക്രമിച്ച് കൊല്ലുന്നത്.