ധരിക്കുന്ന വസ്ത്രവും നിങ്ങളുടെ വ്യക്തിത്വവും തമ്മിൽ ബന്ധമുണ്ടോ? തീർച്ചയായും ഉണ്ട്. ഒരാളുടെ വസ്ത്രം നോക്കിയാൽ അയാളുടെ ജീവിതരീതിയും ഏത് തരത്തിലുള്ള ജോലിയാണ് ചെയ്യുന്നതെന്നൊക്കെ ഒരു പരിധിവരെ മനസിലാക്കാൻ പറ്റും.

ഉദാഹരണത്തിന് ഒരു ഇന്റർവ്യൂവിന് ചുളിവുകൾ വീണ മുഷിഞ്ഞ ഷർട്ട് ധരിച്ചാണ് ചെല്ലുന്നതെങ്കിൽ നിങ്ങളൊരു അലസനാണെന്ന തോന്നൽ ഉണ്ടാക്കും. ഒരു വസ്ത്രം തിരഞ്ഞെടുക്കുമ്പോൾ നിങ്ങൾ പ്രധാനമായും നാല് കാര്യങ്ങൾ ശ്രദ്ധിക്കണം.

ശരീരത്തിന് ചേരുന്ന ഡ്രസ് തിരഞ്ഞെടുക്കുക?

എല്ലാ വസ്ത്രവും എല്ലാവർക്കും ചേരണമെന്നില്ല. ഇഷ്ടതാരങ്ങൾ ധരിക്കുന്നതുപോലുള്ള വസ്ത്രങ്ങൾ ഓൺലൈൻ ഷോപ്പിംഗ് സൈറ്റുകളിലും മറ്റും തപ്പിയെടുത്ത് വാങ്ങുന്നവരുണ്ട്. ശരീര പ്രകൃതി അനുസരിച്ച് വേണം ഡ്രസ് വാങ്ങാൻ. ഉദാഹരണത്തിന് മെലിഞ്ഞവർക്ക് ചേരുന്ന വസ്ത്രം തടിച്ചവർക്കോ, അല്ലെങ്കിൽ നേരെ തിരിച്ചോ യോജിക്കണമെന്നില്ല.

ജോലിക്കനുസരിച്ച് വേണം വസ്ത്രം ധരിക്കാൻ

ജോലി സ്ഥലത്ത് പാലിക്കേണ്ട ചില മര്യാദകളുണ്ട്. ഉദാഹരണത്തിന് ഒരു ഡോക്ടർ നല്ല തിളങ്ങുന്ന സാരിയുടുത്ത് ആശുപത്രിയിൽ പോയാൽ എങ്ങനെയിരിക്കും.

സന്ദർഭത്തിന് അനുയോജ്യമായ വസ്ത്രം വേണം ധരിക്കാൻ

മരണവീട്ടിൽ പോകുമ്പോൾ തിളക്കമുള്ള, കല്ലുകളുള്ള വസ്ത്രം ധരിച്ചാൽ ബോറായിരിക്കും. വെളുത്ത നിറമോ കറുത്ത നിറമോ ഒക്കെയുള്ള സിംപിൾ വസ്ത്രങ്ങൾ ധരിക്കുക. എന്നാൽ ഒരു വിവാഹ ചടങ്ങിൽ പങ്കെടുക്കാനാണ് പോകുന്നതെങ്കിൽ നന്നായി ഒരുങ്ങി, കളർഫുള്ളായ വസ്ത്രം ധരിച്ച് വേണം പോകാൻ.

കാലവസ്ഥയ്ക്ക് യോജിച്ച ഡ്രസ് തിരഞ്ഞെടുക്കുക

കാലാവസ്ഥയ്ക്ക് ചേരുന്ന വസ്ത്രങ്ങളാണ് ധരിക്കേണ്ടത്. ചൂടുകാലമാണെങ്കിൽ വായു സഞ്ചാരമുള്ള കോട്ടൻ വസ്ത്രങ്ങൾ ധരിക്കുന്നതാണ് നല്ലത്. വേനൽക്കാലത്ത് കമ്പിളി വസ്ത്രങ്ങൾ ധരിച്ചാൽ ശരീരത്തിലെ താപനില തകരാറിലാകും.