വൺ പ്ലസിന്റെ സഹസ്ഥാപകനായിരുന്ന കാൾ പേയുടെ സ്വന്തം കമ്പനിയായ നത്തിംഗിന്റെ ആദ്യ ഫോണായ നത്തിംഗ് വൺ അടുത്ത മാസം 12 നാണ് ഇന്ത്യയിൽ അവതരിപ്പിക്കുന്നത്. അതോടൊപ്പം മറ്റൊരു സന്തോഷ വാർത്തയും കമ്പനി പുറത്തുവിട്ടു. നത്തിംഗ് വൺ ഇന്ത്യയിൽ പ്രാദേശികമായി നിർമിക്കും. കമ്പനിയുടെ വൈസ് പ്രസിഡന്റ് മനു ശർമയാണ് ഇക്കാര്യം വ്യക്തമാക്കിയത്.കമ്പനിയുടെ തമിഴ് നാട്ടിലെ പ്ലാന്റിലായിരിക്കും നത്തിംഗ് വൺ സ്മാർട്ട് ഫോൺ ഉത്പാദിപ്പിക്കുക.

അർദ്ധ സുതാര്യമായ (ട്രാൻലൂസന്റ്) രൂപകൽപനയോടെയാണ് ഫോൺ എത്തുന്നത്. ഡിസൈനിൽ ഇതുവരെ ആരും പരീക്ഷിക്കാത്ത രീതിയാണിത്. സമാന ഡിസൈനിൽ ഒരു ഇയർ ബഡും കമ്പനി പുറത്തിറക്കിയിരുന്നു.

പ്രീബുക്കിംഗ്

നത്തിംഗ് വൺ പ്രീ ബുക്കിംഗും ജൂലായ് 12 ന് തന്നെ ആരംഭിക്കും. ഇതിനോടകം തന്നെ ഫ്ലിപ്കാർട്ടിൽ ഫോണിന്റെ പ്രോഡക്ട് പേജ് ലൈവായി കഴിഞ്ഞു. പുറത്തിറക്കുന്നതിന് മുന്നോടിയായി ഫോണിന്റെ ചില സവിശേഷതകളും കമ്പനി പുറത്തുവിട്ടിട്ടുണ്ട്. മിഡ് റേഞ്ച് ഉപയോക്താക്കളെയാണ് നത്തിംഗ് വൺ പ്രധാനമായും ലക്ഷ്യമിടുന്നത്. നത്തിംഗ് വണ്ണിന്റെ യൂസർ മാനുവൽ നേരത്തേ തന്നെ പുറത്തുവന്നിരുന്നു.

നത്തിംഗ് വണ്ണിന്റെ ഇന്ത്യയിലെ വില ഇതുവരെ ഔദ്യോഗികമായി പ്രഖ്യാപിച്ചിട്ടില്ല. 24,999 രൂപയാണ് ടെക്ക് ലോകം പ്രതീക്ഷിക്കുന്ന വില. പ്രാദേശികമായി നിർമിച്ചു തുടങ്ങുമ്പോൾ വിലയിൽ ചെറിവ കുറവ് വരുമെന്നാണ് സൂചന.

ജൂലായ് 12 ന് തന്നെ ഫ്ലിപ്കാർട്ടിൽ ഫോണിന്റെ പ്രീ ബുക്കിംഗ് ആരംഭിക്കുമെന്നാണ് വിവരം. ഏകദേശം 2000 രൂപ നൽകി ഫോൺ പ്രി ബുക്ക് ചെയ്യാം. എന്നാൽ ഫോണിന്റെ ഔദ്യോഗിക ലോഞ്ചിന് ശേഷം ചിലപ്പോൾ ഈ തുകയിൽ മാറ്റം വരാം. ഒന്നിലധികം സ്റ്റോറേജ് വേരിയന്റുകളിൽ നത്തിംഗ് വൺ ലഭ്യമാകുമെന്നും ടെക്ക് ലോകത്തെ വിദഗ്ദ്ധർ പറയുന്നു. 5ജി സപ്പോർട്ടും ഉണ്ടാകും.

നത്തിംഗ് വണ്ണിന്റെ പ്രതീക്ഷിക്കുന്ന സ്പെസിഫിക്കേഷൻസ്

ഡിസ്‌പ്ലേ സ്ക്രീൻ സൈസ് : 6.55 ഇഞ്ച്

റെസല്യൂഷൻ : 2400 x 1080 പിക്സൽ

പാനൽ : ഫുൾ എച്ച് ഡി പ്ലസ് ഓലെഡ്

റിഫ്രഷ് റേറ്റ് : 90 ഹെർട്ട്സ്

പ്രൊസസർ : ക്വാൽകോം സ്നാപ്ഡ്രാഗൺ സെവൻ ജെൻ വൺ, ഒക്ട കോർ, 2.4 ജിഗാ ഹെർട്ട്സ്

റാം : എട്ട് ജി ബി

ഇന്റേണൽ മെമ്മറി : 128 ജി ബി

ഓപ്പറേറ്റിംഗ് സിസ്റ്റം : ആൻഡ്രോയിഡ് 12

ക്യാമറ : 50 എം പി (പ്രൈമറി), എട്ട് എം പി, 2 എം പി എന്നിങ്ങനെ ട്രിപ്പിൾ റിയർ ക്യാമറയും 32 മെഗാ പിക്സൽ ഫ്രണ്ട് ക്യാമറയും

ബാറ്ററി : 4500 എം എ എച്ച് (ഫാസ്റ്റ് ചാർജിംഗ് സപ്പോർട്ടുമുണ്ട്), യു എസ് ബി ടൈപ്പ് സി പോർട്ട്

ഡിസൈൻ

ഉൾഭാഗം കാണാവുന്ന തരത്തിൽ അർദ്ധ സുതാര്യമായ ബാക്ക് പാനലാണ് ഇതിനുണ്ടാവുക. ഉള്ളിലുള്ളതിനെ പുറത്ത് കാണിക്കുക എന്ന തത്വത്തിൽ നിന്നാണ് തങ്ങൾ ഫോൺ രൂപകൽപന ചെയ്യുന്നത് എന്ന് കമ്പനിയുടെ ഡിസൈൻ മേധാവിയായ ടോം ഹോവാർഡ് മുമ്പ് പറഞ്ഞിട്ടുണ്ട്

പിൻവശത്തെ ക്യാമറകൾ, ചാർജിംഗ് കോയിലുകൾ ഉൾപ്പടെയുള്ള ഫോണിനുള്ളിലെ പ്രധാന ഭാഗങ്ങളെ പുറത്ത് ഉള്ളവർക്ക് കാണാനാകുന്ന വിധത്തിലായിരിക്കും ഫോൺ ഡിസൈൻ ചെയ്യുക.

കമ്പനി ആദ്യമായി പുറത്തിറക്കിയ പ്രോഡക്ടായ നത്തിംഗ് ഇയർ വൺ എന്ന ഇയർ ബഡിനും ഇത്തരത്തിൽ ഉൾഭാഗം കാണാനാകുന്ന തരത്തിലുള്ള ഡിസൈനാണ് ഉണ്ടായിരുന്നത്. അതിനാൽ തന്നെ ഫോണിനും അത്തരമൊരു ഡിസൈനാകും ഉണ്ടാവുക എന്ന് തന്നെയാണ് എല്ലാവരും പ്രതീക്ഷിക്കുന്നത്