പാലോട്: ചത്ത മാനിനെ കറിവച്ച് കഴിച്ച വനംവകുപ്പ് ഉദ്യോഗസ്ഥരെ സസ്‌പെൻഡ് ചെയ്തു. പാലോട് സെക്ഷൻ ഫോറസ്റ്റ് ഓഫിസർ അരുണ്‍ ലാല്‍, ബീറ്റ് ഓഫീസര്‍ എസ് ഷജിദ് എന്നിവരെയാണ് സസ്‌പെൻഡ് ചെയ്തത്.
കഴിഞ്ഞ മാസം പത്താം തീയതിയാണ് ചത്ത മാനിനെ പാലോട് വനത്തിനുള്ളിൽ കണ്ടെത്തിയതെന്നും തുടർന്ന് ഉദ്യോഗസ്ഥർ ഇതിനെ കറിവച്ച് കഴിച്ചെന്നുമാണ് അന്വേഷണത്തിൽ കണ്ടെത്തിയത്. ഉദ്യോഗസ്ഥരെ സസ്‌പെൻഡ് ചെയ്തുകൊണ്ട് വനംവകുപ്പിറക്കിയ ഉത്തരവിലാണ് ഇക്കാര്യം പറയുന്നത്.
എന്നാൽ മാനിനെ ഉദ്യോഗസ്ഥർ അപായപ്പെടുത്തിയതാണോ എന്ന രീതിയിൽ ചില സംശയങ്ങളും ഉയരുന്നുണ്ട്. മാനിന്റെ അവശിഷ്ടങ്ങൾ വനത്തിൽ തന്നെ ഉപേക്ഷിച്ചിരുന്നു. സംഭവം ശ്രദ്ധയിൽപ്പെട്ട പാലോട് റേഞ്ച് ഓഫീസർ കഴിഞ്ഞയാഴ്ചയാണ് ഉദ്യോഗസ്ഥർക്കെതിരെ നടപടിക്ക് ശുപാർശ ചെയ്തത്.
സംഭവം റിപ്പോർട്ട് ചെയ്യുന്നത് വൈകിയതിന് റേഞ്ച് ഓഫീസറെയും, കഴിഞ്ഞ മാസം പത്തിന് ഡ്യൂട്ടിയിലുണ്ടായിരുന്ന മുഴുവൻ ബീറ്റ് ഓഫീസർമാരെയും സ്ഥലം മാറ്റിയതായി റിപ്പോർട്ടുണ്ട്.