കഴിഞ്ഞയാഴ്ചയാണ് സ്നാപ്ചാറ്റിന്റെ പാത പിന്തുടർന്ന് ടെലിഗ്രാമും തങ്ങളുടെ പ്രീമിയം പതിപ്പ് അവതരിപ്പിക്കുന്നെന്ന വാർത്തകൾ പുറത്തുവന്നത്. അതിന് പിന്നാലെ പ്രീമിയം ഉപഭോക്താക്കൾക്ക് നൽകുന്ന സേവനങ്ങളുടെ പട്ടിക തന്നെ പുറത്തിറക്കി ടെലിഗ്രാം തങ്ങളുടെ പ്രീമിയം പതിപ്പിന്റെ പ്രഖ്യാപനം ഔദ്യോഗികമായി തന്നെ നടത്തി. നിലവിൽ പ്രതിമാസനിരക്കിലാണ് ടെലിഗ്രാമിന്റെ പ്രീമിയം സബ്സ്ക്രിപ്ഷൻ പ്ളാനുകൾ വരുന്നത്. മാസം 4.99 ഡോളർ എന്ന നിരക്കിലാണ് വിദേശത്തെ പ്രീമിയം ഉപഭോക്താക്കൾക്ക് ടെലിഗ്രാം തങ്ങളുടെ പ്രീമിയം സേവനങ്ങൾ ലഭ്യമാക്കുന്നത്.

എന്നാൽ ഇന്ത്യയിൽ ഉപഭോക്താക്കൾക്ക് നൽകുന്ന സബ്സ്ക്രിപ്ഷൻ പ്ളാനുകളെ കുറിച്ച് ടെലഗ്രാം വ്യക്തമായി ഒന്ന പറഞ്ഞിട്ടില്ല. നാല് ജിബി വരെയുള്ള ഫയൽ അപ്‌ലോഡ്, വേഗമേറിയ ഡൗൺലോഡ്, പ്രത്യേക സ്റ്റിക്കറുകളും റിയാക്ഷനുകളും, മെച്ചപ്പെട്ട ചാറ്റ് മാനേജ്മെന്റ് എന്നിവയാണ് ടെലിഗ്രാം തങ്ങളുടെ പ്രീമിയം ഉപഭോക്താക്കൾക്ക് വാഗ്ദാനം ചെയ്യുന്നത്.
നിലവിൽ ടെലിഗ്രാം ഉപഭേക്താക്കൾക്ക് രണ്ട് ജി ബി വരെയുള്ള ഫയലുകൾ അപ്‌ലോഡ് ചെയ്യാൻ സാധിക്കുന്നുണ്ട്. എന്നാൽ പ്രീമിയം ഉപഭോക്താക്കൾക്ക് ഇനി മുതൽ നാല് ജി ബി വരെയുള്ള ഫയലുകൾ അപ്‌ലോഡ് ചെയ്യാൻ സാധിക്കുമെന്നതാണ് ടെലിഗ്രാമിന്റെ ഏറ്റവും വലിയ വാഗ്ദാനം. അതേസമയം എല്ലാ ഉപഭോക്താക്കൾക്കും ഫയലുകൾ പരിധിയില്ലാതെ സൗജന്യമായി തന്നെ ഡൗൺലോഡ് ചെയ്യാൻ സാധിക്കും.

ഇതിന് പുറമേ പ്രീമിയം ഉപഭോക്താക്കൾക്ക് 1,000 ചാനലുകൾ വരെ പിന്തുടരാൻ സാധിക്കും. ഇതു കൂടാതെ 200 ചാറ്റുകൾ ഉൾപ്പെടുന്ന 20 ചാറ്റ് ഫോൾഡറുകൾ സൃഷ്ടിക്കാനും ടെലിഗ്രാം ആപ്പിലേക്ക് നാലാമത്തെ അക്കൗണ്ട് ചേർക്കാനും പ്രധാന ലിസ്റ്റിൽ 10 ചാറ്റുകൾ പിൻ ചെയ്യാനും ഇഷ്ടപ്പെട്ട 10 സ്റ്റിക്കറുകൾ വരെ സൂക്ഷിക്കാനും പ്രീമിയം മെമ്പർഷിപ്പ് എടുത്തവർക്ക് സാധിക്കും. വോയ്സ് നോട്ടുകൾ ടെക്സ്റ്റിലേക്ക് മാറ്റാൻ സാധിക്കുമെന്നതാണ് മറ്റൊരു പ്രത്യേകത.

പുതിയ വരുമാന മാർഗ്ഗങ്ങൾ തേടുന്നതിന്റെ ഭാഗമായാണ് കമ്പനി ഇത്തരമൊരു മാറ്റത്തിന് തുനിയുന്നത്. രണ്ട് മാസം മുമ്പ് ഇഷ്ടപ്പെട്ട നോട്ടിഫിക്കേഷൻ ടോണുകൾ, ചാറ്റുകൾ മ്യൂട്ട് ചെയ്യുന്നതിനും, ഓട്ടോമാറ്റിക് ഡീലിറ്റ് ചെയ്യുന്നതിനുമുള്ള ഓപ്ഷനുകൾ, ചാറ്റുകളിലെ റിപ്ലേ, ഫോർവേർഡിങ്ങ് എന്നിവയിൽ വരുത്തിയ ക്രമീകരണങ്ങൾ അടങ്ങിയ ഒരു അപ്ഡേഷൻ ടെലഗ്രാം പുറത്തുവിട്ടിരുന്നു.