തൊടുപുഴ: ഭാര്യാ മാതാവിനെ വീട് കയറി മർദ്ദിച്ച ശേഷം മുങ്ങിയ യുട്യൂബർ ആറ് വർഷത്തിന് ശേഷം പിടിയിൽ. വഴിത്തല ഇരുട്ടുതോട് മൂഴിമലയിൽ അജേഷ് ജേക്കബാണ് (38) പിടിയിലായത്. 2016ലാണ് മർദ്ദിച്ച് കാൽ തല്ലിയൊടിച്ചത്. തുടർന്ന് ഒളിവിൽ പോയി. അടുത്തിടെ അജേഷ് തൊടുപുഴയിലെ പാടശേഖരങ്ങളിൽ നിന്നുള്ള മീൻപിടിത്തം എന്ന പേരിൽ യുട്യൂബിൽ വീഡിയോകൾ ചെയ്തത് പൊലീസിന്റെ ശ്രദ്ധയിൽപ്പെട്ടു. പൊലീസ് നടത്തിയ അന്വേഷണത്തിൽ വീഡിയോയിൽ പറയുന്ന സ്ഥലങ്ങൾ എറണാകുളത്തെ വിവിധ സ്ഥലങ്ങളാണെന്ന് കണ്ടെത്തി.

അന്വേഷണത്തിൽ വീഡിയോ എടുക്കാൻ പ്രതിക്ക് സഹായം ചെയ്തിരുന്നയാളെ പൊലീസ് കണ്ടെത്തി. ഇയാളിൽ നിന്ന് പ്രതിയുടെ മൊബൈൽ നമ്പർ വാങ്ങി മീൻ പിടിത്തം ഷൂട്ട് ചെയ്യാൻ താത്പര്യമുള്ള സ്ത്രീയെന്ന വ്യാജേന ചാറ്റ് ചെയ്ത് ചിത്രീകരണ സ്ഥലത്തെത്തിച്ചാണ് പ്രതിയെ വലയിലാക്കിയത്. തൊടുപുഴ സി.ഐ വി.സി. വിഷ്ണുകുമാർ, എസ്.ഐ ബൈജു പി. ബാബു, പ്രൊബേഷനറി എസ്.ഐ നിഖിൽ, സിവിൽ പൊലീസ് ഓഫീസർമാരായ സനീഷ് ടി.എ, രതീഷ് നാരായണൻ, ഗണേഷ്, ജിഷ, രാജേഷ് കെ.വി എന്നിവരുടെ നേതൃത്വത്തിലാണ് പിടികൂടിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.