ഐശ്വര്യത്തിന്റെ പ്രതീകമാണ് നിലവിളക്ക്. അതുകൊണ്ടുതന്നെ പലരും നിത്യവും വീട്ടിൽ വിളക്ക് വയ്ക്കാറുണ്ട്. ചിലർ രാവിലെയും ഒട്ടുമിക്കവരും വൈകിട്ടുമാണ് നിലവിളക്ക് കൊളുത്തുന്നത്. തിന്മയെ അകറ്റി നന്മയുടെ വെളിച്ചം നിറയ്ക്കാനാണ് നിലവിളക്ക് വയ്ക്കുന്നത്. ദൈവങ്ങളുടെ പ്രതീകമായാണ് വിളക്കിനെ കാണുന്നത്. അതിനാൽ തന്നെ മനശുദ്ധിയോടും ശരീരശുദ്ധിയോടും കൂടി മാത്രമേ വിളക്ക് കൊളുത്താൻ പാടുള്ളൂ. ശത്രുദോഷങ്ങളകറ്റി വീട്ടിൽ സമ്പദ്‌സമൃദ്ധി വർദ്ധിക്കാൻ നിലവിളക്ക് കൊളുത്തുന്നത് സഹായിക്കുന്നു. ലക്ഷീ ദേവിയുടെ അനുഗ്രഹം നേടാൻ എപ്പോൾ വിളക്കുകൊളുത്തണമെന്ന് നോക്കാം.

സൂര്യൻ ഉദിക്കുന്നതിന് മുമ്പും അസ്തമിക്കുന്നതിന് മുമ്പും വിളക്ക് കൊളുത്തുന്നതാണ് ഉത്തമം. ഇങ്ങനെ ചെയ്യുന്നതിലൂടെ സമ്പത്തും ഐശ്വര്യവും വർദ്ധിക്കുമെന്നാണ് വിശ്വാസം. തുളസിയില കൊണ്ട് വെള്ളം തളിച്ചശേഷം മാത്രമേ വിളക്ക് കൊളുത്താൻ പാടുള്ളൂ എന്നും വിശ്വാസമുണ്ട്. രാവിലെ കിഴക്ക് ദിക്കിന് അഭിമുഖമായി വേണം വിളക്ക് കൊളുത്താൻ. ഇങ്ങനെ ചെയ്താൽ ദുഖങ്ങൾ ഇല്ലാതാകും. വൈകിട്ട് പടിഞ്ഞാറ് ദിക്ക് നോക്കി വിളക്ക് കൊളുത്തുന്നതാണ് ഉത്തമം. ഇങ്ങനെ ചെയ്താൽ കടബാദ്ധ്യത തീരുന്നതാണ്. വടക്ക് ദിക്കിനഭിമുഖമായി വിളക്ക് കൊളുത്തിയാൽ സമ്പത്ത് വർദ്ധിക്കുമെന്നും വിശ്വാസമുണ്ട്. എന്നാൽ തെക്ക് ദിക്ക് നോക്കി ഒരിക്കലും വിളക്ക് കൊളുത്താൻ പാടില്ല.

വിളക്ക് കൊളുത്തുമ്പോൾ ശുദ്ധമായ എണ്ണവേണം ഉപയോഗിക്കാൻ. ലക്ഷമി ദേവിയുടെ അനുഗ്രഹം ലഭിക്കാനും സമ്പത്ത് വർദ്ധിക്കാനും വെള്ളിയാഴ്ച ദിവസം എണ്ണയിൽ ഒരു ഏലയ്ക്ക കൂടിയിട്ട ശേഷം കൊളുത്തുന്നത് നല്ലതാണ്. ഇതിലൂടെ വീട്ടിൽ പോസിറ്റീവ് ഊർജം പരക്കുകയും ഐശ്വര്യം നിറയ്ക്കുകയും ചെയ്യുന്നു.