കഴിഞ്ഞ ജനുവരിയിൽ മുഖ്യമന്ത്രി പിണറായി വിജയന് ഇന്നോവ ക്രിസ്റ്റ വാങ്ങിച്ച കൂട്ടത്തിൽ തന്നെ ഒരു വാഹനം കൂടി വാങ്ങാൻ പദ്ധതിയുണ്ടായിരുന്നു. അന്ന് ടാറ്റയുടെ ഹാരിയർ ആയിരുന്നു മുഖ്യന് വേണ്ടി അദ്ദേഹത്തിന്റെ സുരക്ഷാ ചുമതലയുള്ള ഉദ്യോഗസ്ഥർ തിരഞ്ഞെടുത്തത്. എന്നാൽ ഡിജിപി അനിൽകാന്ത് തന്നെ നേരിട്ട് ഇടപ്പെട്ടാണ് ഹാരിയർ മാറ്റി പകരം 33 ലക്ഷം രൂപ വില വരുന്ന കിയ കാർണിവൽ വാങ്ങാൻ തീരുമാനമെടുത്തത്. സുരക്ഷാ താത്പര്യം തന്നെയാണ് ഹാരിയറിനെകാളും കാർണിവലിന് നറുക്ക് വീഴാനുള്ള പ്രധാന കാരണങ്ങളിലൊന്ന്.

ഇതുവരെ ഇന്ത്യൻ നിരത്തുകളിൽ എം പി വി അഥവാ മൾട്ടി പർപ്പസ് വെഹിക്കിൾ ശ്രേണിയിൽ മുൻപന്തിയിൽ നിൽക്കുന്നത് ടൊയോട്ടയുടെ ഇന്നോവ തന്നെയാണ്. എന്നാൽ ഇന്നോവയ്ക്ക് കനത്ത വെല്ലുവിളി ഉയ‌ർത്തികൊണ്ടാണ് കിയയുടെ കാർണിവൽ എത്തുന്നത്. യഥാർത്ഥത്തിൽ ഇന്നോവയുടെ ക്ളാസിനും കുറച്ച് ഉയർന്ന് ശ്രേണിയിലാണ് കാർണിവലിന്റെ സ്ഥാനം. അതായത് കാർണിവലിന്റെ ക്ളാസിൽ മത്സരിക്കാൻ ഇന്ത്യയിൽ നിലവിൽ വേറെ വാഹനങ്ങളൊന്നുമില്ല.

ഓസ്ട്രേലിയയുടെ എൻ ക്യാപ് ക്രാഷ് ടെസ്റ്റിൽ ഫൈവ് സ്റ്റാർ റേറ്റിംഗ് നേടിയ ശേഷമാണ് കാർണിവൽ ഇന്ത്യൻ വിപണിയിലെത്തുന്നത്. യാത്രക്കാരുടെ സുരക്ഷയുടെ കാര്യത്തിലും കൊളീഷൻ അവോയിഡൻസ് അസസ്മെന്റിലും മികച്ച റേറ്റിംഗ് ആണ് കാർണിവൽ സ്വന്തമാക്കിയത്. ഇതിന് പുറമേ യാത്രക്കാരുടെ സുരക്ഷാ കാര്യങ്ങളിൽ നൽകിയിട്ടുള്ള ഫീച്ചറുകളുടെ മികവാണ് കാർണിവലിനെ മികച്ചതാക്കുന്നത്. മുതിർന്നവർക്കും കുട്ടികൾക്കുമുള്ള സുരക്ഷയിൽ മികച്ച റേറ്റിംഗ് സ്വന്തമാക്കിയ കാർണിവൽ, സൈഡ് ഇംപാക്ട് ടെസ്റ്റിലും (വശങ്ങളിൽ നിന്നുള്ള ആഘാതം) ഫ്രണ്ടൽ ഇംപാക്ട് ടെസ്റ്റിലും (മുൻ ഭാഗത്ത് നിന്നുള്ള ആഘാതം) മികച്ച പ്രകടനമാണ് കാഴ്ചവച്ചത്.

ഐ.എസ്.ഒ. ഫിക്‌സ് ആങ്കർ, ഓട്ടോണമസ് എമർജൻസി ബ്രേക്കിംഗ്, ആക്ടീവ് ലെയ്ൻ കീപ്പിംഗ്, ഹെഡ്-പ്രൊട്ടക്ടിംഗ് എയർബാഗ്, ഇന്റലിജെന്റ് സീറ്റ് ബെൽറ്റ് റിമൈന്‍ഡർ എന്നിവയും വാഹനത്തിന്റെ സുരക്ഷ ഉയർത്തുന്ന സംവിധാനങ്ങളാണ്.

മൂന്ന് നിറങ്ങളിലാണ് കിയ എത്തുന്നത്. വെള്ള. സിൽവർ, കറുപ്പ് എന്നീ നിറങ്ങളാണ് ഇവ. ഇതിൽ കറുത്ത നിറമാകാം മുഖ്യമന്ത്രിക്ക് വേണ്ടിയുള്ള വാഹനത്തിന്റെ നിറം. ഏഴ്, എട്ട്, ഒൻപത് എന്നിങ്ങനെ ഉപഭോക്താക്കളുടെ ആവശ്യം അനുസരിച്ച് സീറ്റുകൾ ക്രമീകരിക്കാം. BS6 മലിനീകരണ നിയന്ത്രണങ്ങൾ പാലിക്കുന്ന 2.2-ലിറ്റർ നാല്-സിലിണ്ടർ സിആർഡിഐ ടർബോ-ഡീസൽ എഞ്ചിൻ ആണ് കാർണിവലിന്‍റെ ഹൃദയം. ഈ വാഹനത്തിന്റെ പെട്രോൾ മോഡൽ കിയ ഇറക്കുന്നില്ല. 200 എച്ച്പി പവറും, 440 എൻഎം ടോർക്കും ഇത് ഉത്പാദിപ്പിക്കുന്നു. 8-സ്പീഡ് സ്പോർട്സ്മാറ്റിക് ഓട്ടോമാറ്റിക്കാണ് ട്രാൻസ്‍മിഷൻ.