ചിറ്റാർ: പരിസ്ഥിതി ദിനത്തോടനുബന്ധിച്ച് പ്ലാവ് നട്ട് സ്കൂൾ കുട്ടികൾ. കുട്ടിക്കൊരു കുഞ്ഞി പ്ലാവ് എന്ന പദ്ധതി ആവിഷ്‌കരിച്ച് നടപ്പിലാക്കിയത് വയ്യാറ്റുപുഴ വി.കെ.എൻ.എം വി.എച്ച്. എസ്. എസിലെ കുട്ടികളും അദ്ധ്യാപകരും ചേർന്നാണ്. സ്‌കൂളിലെ എൻ. എസ്.എസ് കൂട്ടായ്മയുടെ നേതൃത്വത്തിൽ മൂന്ന് വർഷം നീണ്ട സസ്യ സരക്ഷണ പദ്ധതിയാണ് ഇത്. 1 മുതൽ 11 ആം ക്ലാസുവരെ പഠിക്കുന്ന കുട്ടികളുടെ വീടുകളിലാണ് വിയറ്റ്‌നാം ആയുർ ജാക് ഇനത്തിൽപ്പെട്ട പ്ലാവുകൾ നട്ടത്. നന്നായി പ്ലാവിനെ പരിചരിക്കുന്ന കുട്ടിക്ക് സ്കൂൾ മാനേജ്‌മെന്റ് അടുത്ത വർഷം അവാർഡ് നൽകും. ചിറ്റാർ പഞ്ചായത്ത് പ്രസിഡന്റ് സജി കുളത്തുങ്കൽ, വൈസ് പ്രസിഡന്റ് രവികല എബി, വയ്യാറ്റുപുഴ സർവീസ് സഹകരണം സംഘം പ്രസിഡന്റ് ബിജു പി മാർക്കോസ് പഞ്ചായത്ത് അംഗങ്ങൾ തുടങ്ങിയവർ അദ്ധ്യാപകർക്കൊപ്പം അതാതു കുട്ടികളുടെ വീട്ടിലെത്തിയാണ് തൈ നട്ടത്. സ്കൂൾ അഡ്മിനിസ്‌ട്രേറ്റർ വേണുഗോപാല പിള്ള, ഫിനാൻസ് വിഭാഗം തലവൻ സാബു വിഴിക്കതോട്, നിഖുൽ രോഹിത്, സ്കൂൾ പ്രിൻസിപ്പൽ ജോതിഷ് കുമാർ എൻ, സീനിയർ അസിസ്റ്റന്റ് കൃഷ്ണകുമാരി തുടങ്ങിയവർ പങ്കെടുത്തു.