തിരുവല്ല: നഗരത്തിലെ ബൈപ്പാസിൽ കാർ സ്കൂട്ടറിലിടിച്ചുണ്ടായ അപകടത്തിൽ സ്കൂട്ടർ യാത്രികന് പരിക്കേറ്റു. തിരുവല്ല നഗരത്തിൽ പൂക്കട നടത്തുന്ന ചങ്ങനാശ്ശേരി കുന്നുംപുറം സ്വദേശി ജോയി (58) യ്ക്കാണ് പരിക്കേറ്റത്. ബൈപ്പാസിലെ പുഷ്പഗിരി ജംഗ്ഷനിൽ ഇന്നലെ രാവിലെ 11നാണ് അപകടം. മഴുവങ്ങാട് ഭാഗത്ത് നിന്ന് വന്ന കാർ പുഷ്പഗിരി റോഡിൽ നിന്ന് ബൈപ്പാസിലേക്ക് പ്രവേശിച്ച സ്കൂട്ടറിൽ ഇടിക്കുകയായിരുന്നു. അപകടത്തിൽ തലയ്ക്കും കാലിനും സാരമായി പരിക്കേറ്റ ജോയിയെ തിരുവല്ല താലൂക്ക് ആശുപത്രിയിൽ പ്രവേശിപ്പിച്ചു. അപകടത്തിൽപ്പെട്ട കാർ ഉച്ചയോടെ സംഭവസ്ഥലത്ത് നിന്ന് നീക്കം ചെയ്തു.