പത്തനംതിട്ട: മെഴുവേലിയിലെ ഡി.വൈ.എഫ്.ഐ നേതാവ് എസ്. മനുവിന്റെ കർണപടം അടിച്ചുപൊട്ടിച്ച ഇലവുംതിട്ട എസ്.ഐ മാനുവലിനെ പമ്പ പൊലീസ് സ്റ്റേഷനിലേക്ക് സ്ഥലം മാറ്റി. സംഭവത്തിൽ പങ്കാളിയായ പൊലീസുകാരൻ അൻവർഷായെ പന്തളത്തേക്ക് മാറ്റി. പത്തനംതിട്ട ഡിവൈ.എസ്.പി നന്ദകുമാറിന്റെ അന്വേഷണ റിപ്പോർട്ടിനെത്തുടർന്നാണ് നടപടി.

കഴിഞ്ഞ ദിവസം വീടിന് സമീപം നിന്ന മനുവിനെ കഞ്ചാവ് ഉണ്ടോയെന്ന് ചോദിച്ച് ഷർട്ട് ഊരിച്ച് പരിശോധിച്ചത് ചോദ്യം ചെയ്തപ്പോൾ എസ്.ഐയുടെ നേതൃത്വത്തിൽ ഇരുകരണത്തും അടിച്ചുവെന്നായിരുന്നു പരാതി. കോഴഞ്ചേരി ജില്ലാ ആശുപത്രിയിൽ പ്രവേശിപ്പിച്ച മനുവിന് കേൾവിക്ക് തകരാറുണ്ടായി. കർണപടത്തിന് നേരിയ പൊട്ടൽ സംഭവിച്ചതായി കണ്ടത്തിയിരുന്നു.