പ്രമാടം : കൊവിഡിന്റെ പേരിൽ നിറുത്തലാക്കിയ കെ.എസ്.ആർ.ടി.സി ബസ് സർവീസുകൾ പുന:രാരംഭിക്കണമെന്ന് ആവശ്യപ്പെട്ട് നാട്ടുകാർ പ്രക്ഷോഭത്തിലേക്ക്. ജില്ലാ ആസ്ഥാനത്ത് നിന്നും പ്രമാടം -പൂങ്കാവ് -കോന്നി റൂട്ടിൽ ചെയിൻ സർവീസ് നടത്തിയിരുന്ന ഏഴ് ബസുകളാണ് രണ്ട് വർഷം മുമ്പ് നിറുത്തലാക്കിയത്. ഇതേ തുടർന്ന് വിദ്യാർത്ഥികൾ ഉൾപ്പടെയുള്ള യാത്രക്കാർ നടന്ന് വലയുകയാണ്. നാട്ടുകാർക്ക് ഏറെ പ്രയോജനകരമായിരുന്ന ഈ സർവീസുകൾ പുന:രാരംഭിക്കണമെന്ന് ആവശ്യപ്പെട്ടാണ് നാട്ടുകാർ ആക്ഷൻ കൗൺസിൽ രൂപീകരിച്ച് പ്രക്ഷോഭത്തിന് ഒരുങ്ങുന്നത്. എല്ലാ സർവീസുകളും ഉടൻ തുടങ്ങണമെന്നും വിദ്യാർത്ഥികൾക്ക് പ്രയോജനകരമായ രീതിയിൽ കൂടുതൽ സർവീസുകൾ അനുവദിക്കണമെന്നും ആവശ്യപ്പെട്ട് കെ.യു.ജനീഷ് കുമാർ എം.എൽ.എ, മോട്ടോർ വാഹന വകുപ്പ് പ്രമാടം, കോന്നി പഞ്ചായത്തുകൾ, പത്തനംതിട്ട നഗരസഭ എന്നിവർക്ക് നിവേദനം നൽകും. അടിയന്തര നടപടി ഉണ്ടായില്ലെങ്കിൽ കോന്നി എ.ടി.ഒ, പത്തനംതിട്ട ഡി.ടി.ഒ ഓഫീസുകൾക്ക് മുന്നിലും എം.എൽ.എ ഓഫീസിന് മുന്നിലും പ്രതിഷേധ സമരങ്ങൾ സംഘടിപ്പിക്കാനും തീരുമാനമുണ്ട്.

സർവീസ് നിറുത്തിയത് രണ്ട് വർഷം മുമ്പ്

കൊവിഡ് നിയന്ത്രണങ്ങളിൽ ഇളവ് വരുമ്പോൾ ഇവ ഘട്ടംഘട്ടമായി പുന:രാരംഭിക്കുമെന്ന് അധികൃതർ പറഞ്ഞിരുന്നെങ്കിലും ഒന്നും പാലിക്കപ്പെട്ടില്ല. ഈ റൂട്ടിൽ സർവീസ് നടത്തുന്ന നേരത്തെ സർവീസ് നടത്തിയിരുന്ന ചില സ്വകാര്യ ബസുകളെ സഹായിക്കാനാണ് ഡിപ്പോ അധികൃതർ ലാഭത്തിൽ പ്രവർത്തിച്ചിരുന്ന സർവീസുകൾ അട്ടിമറിച്ചതെന്നും ആക്ഷേപമുണ്ട്. ഇപ്പോൾ സ്വകാര്യ ബസുകളും നാമമാത്രമാണ്.

.......

കോന്നി ഡിപ്പോകളിൽ നിന്ന് സ്‌കൂൾ സമയങ്ങളിൽ പ്രത്യേക കെ.എസ്.ആർ.ടി.സി ബസുകൾ അനുവദിക്കുമെന്ന് മന്ത്രി ഉൾപ്പടെയുള്ളവർ നേരത്തെ ഉറപ്പ് നൽകിയിരുന്നെങ്കിലും ഒന്നും പാലിക്കപ്പെട്ടിട്ടില്ല.

രാജി

(യാത്രക്കാരി)​