ശാസ്താംകോട്ട: വീട്ടിലെ മിഠായി കവറുകൾ പോലും മണ്ണിലേക്ക് വലിച്ചെറിയുന്നത് വലിയ ദോഷം ചെയ്യുമെന്ന് തിരിച്ചറിഞ്ഞ നിമിഷം മുതൽ

തുടങ്ങിയതാണ് രണ്ടാം ക്ലാസുകാരി ഗൗരിയുടെ ആലോചന.

സ്വന്തം വീട്ടിലെ പ്ലാസ്റ്റിക്കിനെ തുരത്താൻ ഒരു മാർഗം കണ്ടെത്താനായിരുന്നു അത്. എന്നാൽ,​ യുട്യൂബർ കൂടിയായ ഗൗരിക്ക് അധികം ചിന്തിക്കേണ്ടിവന്നില്ല,​ അതിനുമുമ്പ് കുഞ്ഞുബുദ്ധിയിൽ തെളിഞ്ഞു ഒരു ഉഗ്രൻ ഐഡിയ!

വീട്ടിലെ പ്ലാസ്റ്റിക് കവറുകളും കുപ്പികളും നുള്ളിപ്പെറുക്കി,​ എണ്ണിതിട്ടപ്പെടുത്തി സൂക്ഷിച്ചുവച്ചു. രണ്ട് മാസങ്ങളിൽ വീട്ടിലെത്തിയ പ്ലാസ്റ്റിക്കുകൾ തന്നെ 400 ഗ്രാം ഉണ്ടായിരുന്നു. ഇതെല്ലാം കുപ്പികളിൽ നിറച്ചു. എന്നിട്ട് കുപ്പികൾ കൂട്ടിക്കെട്ടി,​ അതിനുമുകളിൽ ഇരിക്കാൻ പോന്ന ഒരു പ്രതലം വച്ചു പിടിപ്പിച്ചു.

അങ്ങനെ അതൊരു അടിപൊളി സ്‌റ്റൂളായി! മാത്രമല്ല,​ ശൂരനാട് നടുവിൽ എൽ. പി.എസിലെ വിദ്യാത്ഥിയായ ഗൗരി യുട്യൂബിൽ വൈറലുമായി.