കൊട്ടാരക്കര: റെയിൽവേ സ്റ്റേഷൻ കവലയ്ക്ക് സമീപം കാർ സ്കൂട്ടറിലിടിച്ചു, നിയന്ത്രണംവിട്ട സ്കൂട്ടർ സ്കൂൾ ബസിനടിയിലേക്ക് ഇടിച്ചുകയറി, രണ്ട് വനിതകൾക്ക് പരിക്കേറ്റു. കൊട്ടാരക്കര സപ്ളൈകോ ഡിപ്പോയിലെ ജീവനക്കാരായ സുജ, സിനി എന്നിവർക്കാണ് പരിക്കേറ്റത്. ഇവരെ കൊട്ടാരക്കരയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ വൈകിട്ട് 6നാണ് സംഭവം. കൊല്ലം- തിരുമംഗലം ദേശീയ പാതയിൽ നിന്നു് നീലേശ്വരത്തേക്ക് തിരിയുന്ന ഭാഗത്താണ് സംഭവം. ഓഫീസിൽ നിന്ന് വീട്ടിലേക്ക് മടങ്ങുകയായിരുന്നു സിനിയും സുജയും. പിന്നാലെ വന്ന കാർ ഇവരുടെ സ്കൂട്ടറിന് പിന്നിൽ ശക്തിയായി ഇടിച്ചു. സ്കൂട്ടർ തൊട്ടുമുന്നിൽ പോയ സ്കൂൾ ബസിന്റെ പിന്നിലേക്കിടിച്ച് അടിഭാഗത്തേക്ക് കുടുങ്ങി. സ്കൂട്ടറിലുള്ളവർ റോഡിലേക്ക് വീണുവെങ്കിലും സാരമായി പരിക്കേറ്റില്ല. സ്ഥലത്ത് വലിയ തോതിൽ ഗതാഗത കുരുക്ക് ഉണ്ടായി. പിന്നീട് പൊലീസ് എത്തിയാണ് ബസിന്റെ അടിയിൽ നിന്നും സ്കൂട്ടർ പുറത്തെടുത്ത് ഗതാഗത തടസം മാറ്റിയത്. കൊട്ടാരക്കര പൊലീസ് കേസെടുത്തു.