പടിഞ്ഞാറേ കല്ലട: മീനെടുക്കാൻ നീണ്ടകരയിലേക്ക് പോയ പിക്ക് അപ്പ് വാൻ ഇടിച്ച് സെക്യൂരിറ്റി ജീവനക്കാരൻ മരിച്ചു. കുണ്ടറ നെടുമ്പായിക്കുളം ജെ.ബി ഭവനിൽ ജോൺസണാണ് (70) മരിച്ചത്. കഴിഞ്ഞദിവസം രാവിലെ ആറോടെ ശാസ്താംകോട്ടയ്ക്ക് സമീപം ആദിക്കാട്ട് മുക്കിലായിരുന്നു അപകടം.

കാവേരി ക്രഷർ യൂണിറ്റിലെ സെക്യൂരിറ്റിയായിരുന്ന ജോൺസൺ ചായ കുടിക്കാൻ നടന്നുപോകുമ്പോഴായിരുന്നു വാഹനം ഇടിച്ച് തെറിപ്പിച്ചത്. അപകടശേഷം വാഹനം നിറുത്താതെ പോയി. ക്രഷർ ജീവനക്കാർ ജോൺസനെ ശാസ്താംകോട്ട താലൂക്ക് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് കൈമാറി.