കൊല്ലം: അയൽ വാസികളായ ദമ്പതികളെ കമ്പിവടി കൊണ്ടടിച്ച് മാരകമായി പരിക്കേൽപ്പിച്ചയാളെ കരുനാഗപ്പള്ളി പൊലീസ് അറസ്​റ്റ് ചെയ്തു. അയണിവേൽക്കുളങ്ങര കോഴിക്കോട് മുറിയിൽ പ്രസാദ് ഭവനിൽ ഭാർഗവൻ(62) ആണ് പൊലീസിന്റെ പിടിയിലായത്. ഇയാളുടെ അയൽവാസികളായ സുരേന്ദ്രനും ഭാര്യയുമാണ് ആക്രമണത്തിന് ഇരയായത്. 27ന് ഉച്ചയ്ക്ക് 2 മണിയോടെ വീടിന് മുന്നിലുള്ള റോഡിൽ സുരേന്ദ്രന്റെ ഭാര്യ ലീലയുമായി പ്രതി വാക്കുതർക്കത്തിലാകുകയും അസഭ്യം വിളിച്ചുകൊണ്ട് കമ്പിവടി
ഉപയോഗിച്ച് അടിക്കുകയുമായിരുന്നുവെന്ന് പൊലീസ് പറഞ്ഞു. ലീലയെ അടിക്കുന്നത് കണ്ട് ഓടി വന്ന
സുരേന്ദ്രനെയും കമ്പിവടി ഉപയോഗിച്ച് തലക്കടിച്ച് മാരകമായി പരിക്കേൽപ്പിച്ചു. പരിക്കേ​റ്റ സുരേന്ദ്രനും ലീലയും ചികിത്സയിലാണ്. സുരേന്ദ്രന്റെ പരാതിയിൽ കരുനാഗപ്പള്ളി പൊലീസ് രജിസ്​റ്റർ ചെയ്ത കേസിലാണ് അറസ്​റ്റ്. കരുനാഗപ്പള്ളി എ.സി.പി വി.എസ് പ്രദീപ് കുമാറിന്റെ നിർദ്ദേശ പ്രകാരം
സ്​റ്റേഷൻ ഇൻസ്‌പെക്ടർ ജി. ഗോപകുമാർ, സബ് ഇൻസ്‌പെക്ടർ അലോഷ്യസ് അലക്‌സാണ്ടർ, സി. പി. ഒ ശ്രീകുമാർ, രജീഷ് എന്നിവരടങ്ങിയ സംഘമാണ് ഇയാളെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.