തൃപ്രയാർ: ആർ.എസ്.എസിന് പട്ടാളത്തിൽ നുഴഞ്ഞുകയറാനുള്ള വേദിയാണ് അഗ്‌നിപഥെന്ന് എൽ.ഡി.എഫ് കൺവീനർ ഇ.പി. ജയരാജൻ. തൃപ്രയാറിൽ സി.പി.എം നാട്ടിക ഏരിയ കമ്മറ്റി ഓഫീസ് ശിലാസ്ഥാപനവും കെ.വി പീതാംബരൻ അനുസ്മരണ സമ്മേളനവും ഉദ്ഘാടനം ചെയ്യുകയായിരുന്നു അദ്ദേഹം. മോദി സർക്കാർ യുവാക്കൾക്കുനേരെ യുദ്ധം പ്രഖ്യാപിച്ചിരിക്കുകയാണ്. ആർ.എസ്.എസുകാരന് പരിശീലനം നൽകുകയാണ് അഗ്‌നിപഥിലൂടെ ലക്ഷ്യമിടുന്നതെന്നും അദ്ദേഹം പറഞ്ഞു.
ടി.എസ്.ജി.എ സ്റ്റേഡിയത്തിൽ നടന്ന യോഗത്തിൽ സംഘാടക സമിതി ചെയർമാൻ പി.എം. അഹമ്മദ് അദ്ധ്യക്ഷനായി. ജില്ലാ സെക്രട്ടറി എം.എം. വർഗീസ്, കെ.വി അബ്ദുൾ ഖാദർ, എം.എ. ഹാരിസ് ബാബു, പ്രൊഫ. കെ.യു. അരുണൻ മാസ്റ്റർ, അഡ്വ. വി.കെ. ജ്യോതി പ്രകാശ്, കെ.എ. വിശ്വംഭരൻ, കെ.ആർ. സീത, എ.എസ് ദിനകരൻ, കെ.ബി ഹംസ, കവി ഏങ്ങണ്ടിയൂർ ചന്ദ്രശേഖരൻ എന്നിവർ സംബന്ധിച്ചു.
കെ.വി പീതാംബരൻ സ്മാരക ലൈബ്രറിയിലേക്ക് ലോക്കൽ കമ്മിറ്റികളും വർഗബഹുജനസംഘടനകളും, വ്യക്തികളും പുസ്തകങ്ങൾ കൈമാറി. കെ.വി. പീതാംബരൻ സ്മാരക പബ്‌ളിക്ക് ലൈബ്രറിയുടെ ശിലാസ്ഥാപനവും ഇ.പി. ജയരാജൻ നിർവഹിച്ചു.