തിരുവനന്തപുരം:നാളുകൾക്ക് ശേഷം കൂട്ടുകാർക്കൊപ്പമെത്തിയതിന്റെ ആവേശത്തിലായിരുന്നു വഴുതക്കാട് കാഴ്‌ച പരിമിതർക്കുളള സർക്കാർ വിദ്യാലയത്തിലെ കുരുന്നുകൾ.കൂട്ടുകാരെ തിരിച്ചറിയാൻ ശബ്‌ദവും സാമീപ്യവും അവർക്ക് ധാരാളമായിരുന്നു.പുത്തനുടുപ്പും പുതിയ പ്രതീക്ഷകളുമായെത്തിയ വിദ്യാർത്ഥികളെ മധുരം നൽകിയാണ് സ്‌കൂൾ അധികൃതർ സ്വീകരിച്ചത്. പാട്ടു പാടിയും കുസൃതികൾ പങ്കുവച്ചും കുട്ടികൾ പ്രവേശനോത്സവം ആഘോഷമാക്കി. സീരിയൽ നടി മനീഷാ മഹേഷാണ് ഉദ്ഘാടനം ചെയ്‌തത്. ഈ അദ്ധ്യയന വർഷത്തിൽ പുതുതായി പ്രവേശനം നേടിയ അഞ്ച് പേർ ഉൾപ്പെടെ 60 വിദ്യാർത്ഥികളാണ് വിദ്യാലയത്തിലുള്ളത്. വിദ്യാർത്ഥികൾക്ക് താമസിച്ച് പഠിക്കുന്നതിനുള്ള സൗകര്യവും ഇവിടെയുണ്ട്.ഏഴാം തരം വരെയുള്ള കുട്ടികളാണ് പഠിക്കുന്നത്. ജില്ലയ്‌ക്ക് പുറമെ മറ്റ് മൂന്ന് സമീപ ജില്ലകളിലെ വിദ്യാർത്ഥികളും ഇവിടെയുണ്ട്. പ്രഥമാദ്ധ്യാപകൻ ബി.വിനോദ്, പി.ടി.എ പ്രസിഡന്റ് ജയലക്ഷ്‌മി, ക്ലസ്റ്റർ കോർഡിനേറ്റർ ജിലു, എസ്.എസ്.ആർ.ജി കൺവീനർ എസ്.സതീഷ്, സ്റ്റാഫ് സെക്രട്ടറി ഹബി.എ, സീനിയർ അസിസ്റ്റന്റ് സ്‌മിത ടൈറ്റസ് എന്നിവർ പങ്കെടുത്തു.