തിരുവനന്തപുരം: കഴിഞ്ഞവർഷം സംസ്ഥാനത്തെ മികച്ച പൊലീസ് സ്​റ്റേഷനായി കേന്ദ്ര ആഭ്യന്തരമന്ത്റാലയം തിരഞ്ഞെടുത്ത ഒ​റ്റപ്പാലം സ്​റ്റേഷന് പൊലീസ് മേധാവി അനിൽകാന്ത് പുരസ്കാരം സമ്മാനിച്ചു. നിലവിലെ സ്​റ്റേഷൻ ഹൗസ് ഓഫീസർ വി.ബാബുരാജ്, കഴിഞ്ഞവർഷം സ്​റ്റേഷൻ ഹൗസ് ഓഫീസർമാർ ആയിരുന്ന ജയേഷ് ബാലൻ, എം.സുജിത്ത് എന്നിവർ പൊലീസ് ആസ്ഥാനത്ത് നടന്ന ചടങ്ങിൽ ബഹുമതി ഏ​റ്റുവാങ്ങി.

ഒ​റ്റപ്പാലം മുൻസിപ്പാലി​റ്റി, ലക്കിടി പേരൂർ, അമ്പലപ്പാറ, വാണിയംകുളം, അനങ്ങനടി പഞ്ചായത്തുകൾ എന്നിവ ഉൾപ്പെടുന്നതാണ് ഒറ്റപ്പാലം സ്​റ്റേഷൻ. സ്ത്രീസൗഹൃദ, ശിശുസൗഹൃദ സ്റ്റേഷനാണ്. ഇവിടെ അഞ്ച് വനിതാ പൊലീസ് ഉദ്യോഗസ്ഥരുൾപ്പെടെ 53 പേർ ജോലിചെയ്യുന്നു. എസ്.എച്ച്.ഒയ്ക്ക് പുറമെ ട്രെയിനിംഗിനായി എത്തിയ എ.എസ്.പി ടി.കെ.വിഷ്ണു പ്രദീപ്, ഇൻസ്‌പെക്ടർമാരായ എം.സുജിത്ത്, ജയേഷ് ബാലൻ എന്നിവരാണ് 2021 ൽ സ്​റ്റേഷൻ ചുമതല വഹിച്ചിരുന്നവർ.