തിരുവനന്തപുരം കെ.എസ്.ആർ.ടി.സി തൊഴിലാളികളുടെ ശമ്പളം എല്ലാ മാസവും അഞ്ചിനു മുമ്പായി നൽകുക, സ്വി​ഫ്റ്റ് കമ്പനി​ പി​ൻവലി​ക്കുക തുടങ്ങി​യ വി​വി​ധ ആവശ്യങ്ങൾ ഉന്നയി​ച്ച് ട്രാൻസ്‌പോർട്ട് ഡെമോക്രാറ്റിക് ഫെഡറേഷന്റെ നേതൃത്വത്തിൽ ട്രാൻസ്‌പോർട്ട് ഭവന് മുന്നിൽ ജൂൺ 6ന് തുടങ്ങി​യ അനിശ്ചിതകാല രാപ്പകൽ സത്യാഗ്രഹം 13 മുതൽ റിലെ നിരാഹാര സത്യാഗ്രഹമെന്ന രണ്ടാംഘട്ടത്തിലേക്ക് കടക്കും. ട്രാൻസ്‌പോർട്ട് വർക്കേഴ്സ് യൂണിയന്റെയും ട്രാൻസ്‌പോർട്ട് ഡ്രൈവേഴ്സ് യൂണിയന്റെയും ജനറൽ സെക്രട്ടറിമാരായ ആർ.ശശിധരനും ടി​. സോണിയും രാവി​ലെ ഒമ്പതുമണി​ക്ക് തുടങ്ങി​യ സമരത്തി​ൽ പങ്കെടുക്കുമെന്ന് ടി.ഡി.എഫ് സംസ്ഥാന പ്രസിഡന്റ് തമ്പാനൂർ രവി അറിയിച്ചു. എൻ.കെ. പ്രേമചന്ദ്രൻ എംപി ഉദ്ഘാടനം ചെയ്യും. വി. എസ്. ശിവകുമാർ,എം. വിൻസന്റ് എംഎൽഎ ഉൾപ്പെടെ പ്രമുഖ യുഡിഎഫ്,ട്രേഡ് യൂണിയൻ നേതാക്കൾ പങ്കെടുക്കും. ഇടതുസർക്കാർ 2016 ൽ അധികാരത്തിലെത്തി​യതുമുതൽ കെ.എസ്.ആർ.ടിസിയെ തകർക്കുകയും ട്രാൻസ്‌പോർട്ട് തൊഴിലാളികളെ നിരന്തരം പീഡിപ്പിക്കുകയും ഈ പൊതുമേഖല സ്ഥാപനത്തെ ഘട്ടംഘട്ടമായി സ്വകാര്യവത്കരിക്കുകയുമാണ് ചെയ്യുന്നത്. മുഖ്യമന്ത്രി അടിയന്തരമായി ഈ പ്രശ്നത്തിൽ ഇടപ്പെട്ട് പരിഹാരം കണ്ടെത്തണമെന്ന് ആവശ്യപ്പെട്ട് തമ്പാനൂർ രവി മുഖ്യമന്ത്രിക്ക് കത്ത് നൽകി.