നെയ്യാറ്റിൻകര: ലോക ഭക്ഷ്യസുരക്ഷ ദിനാഘോഷത്തോടനുബന്ധിച്ച് കേന്ദ്ര കിഴങ്ങ് ഗവേഷണ കേന്ദ്രവും കുളത്തൂര്‍ ഗ്രാമപഞ്ചായത്ത് കൃഷി ഭവനും സംയുക്തമായി മരച്ചീനി ശാസ്ത്രീയ കൃഷിയും ആരോഗ്യവും എന്ന വിഷയത്തിൽ പരിശീലന ക്ലാസ് സംഘടിപ്പിച്ചു. കിഴങ്ങ് ഗവേഷണ കേന്ദ്രം ക്രോപ് പ്രൊഡക്ഷൻ മേധാവി ജി. ബൈജു ക്ലാസെടുത്തു. കുളത്തൂര്‍ ഗ്രാമപഞ്ചായത്തിൽ ഈ വർഷം മരച്ചീനിയുടെ 25 പ്രദർശന തോട്ടങ്ങൾ ഒരുക്കാനും കേന്ദ്ര കിഴങ്ങ് ഗവേഷണ കേന്ദ്രം തീരുമാനിച്ചു. അവയ്ക്കായുള്ള സാങ്കേതിക സഹായവും കേന്ദ്രം നൽകും. കർഷകർ നേരിടുന്ന പ്രധാന പ്രശ്നമായ മികച്ചയിനം നടീൽ വസ്തുക്കൾക്കുള്ള ലഭ്യതക്കുറവ് പരിഹരിക്കുന്നതിനും കേന്ദ്രം തുടക്കം കുറിച്ചു. പരിശീലന പരിപാടിയിൽ പങ്കെടുത്ത കർഷകർക്ക് നടീൽ വസ്തുക്കളും മൈക്രോഫുഡും സൗജന്യമായി വിതരണം ചെയ്തു. നല്ലൂർവട്ടം വാർഡ് അംഗം എസ്. രാജഗോപാൽ ചടങ്ങിൽ അദ്ധ്യക്ഷനായിരുന്നു. കൃഷി ഓഫീസ ചന്ദ്രലേഖ. സി.എസ്, കൃഷി അസിസ്റ്റൻഡ് അനൂപ്, കേന്ദ്ര കിഴങ്ങ് ഗവേഷണ കേന്ദ്രം സീനിയർ ടെക്നീഷ്യൻ രെജിൻ. ഡി.ടി എന്നിവർ പങ്കെടുത്തു.