കല്ലമ്പലം: നാവായിക്കുളം വൈരമലയിൽ കട കുത്തിത്തുറന്ന് 23,000 രൂപ കവർന്നു. നസീമിന്റെ ഉടമസ്ഥതയിലുള്ള അൽ ബയാൻ ജനറൽ സ്റ്റോറിലാണ് കവർച്ച നടന്നത്. സി.സി ടിവി നിരീക്ഷണത്തിലുള്ള കടയിൽ മോഷണ ദൃശ്യങ്ങൾ ലഭിക്കാതിരിക്കാൻ ഡി.വി.ആർ അടക്കം കള്ളന്മാർ കൊണ്ടുപോയി. പണം കൂടാതെ കടയിൽ നിന്ന് സിഗരറ്റും നഷ്ടപ്പെട്ടു.

പണം സൂക്ഷിച്ചിരുന്ന മേശ കുത്തിത്തുറന്ന് മേശ വലിപ്പ് വലിച്ചൂരിയെടുത്ത് സമീപത്തെ വീട്ടുവളപ്പിൽ ഉപേക്ഷിച്ചിരുന്നു. കടയെക്കുറിച്ചും ചുറ്റുപാടുകളെക്കുറിച്ചും വ്യക്തമായി അറിയാവുന്ന ആളാകാം കവർച്ചയ്ക്ക് പിന്നിലെന്ന് സംശയിക്കുന്നു. പുലർച്ചെ 4ഓടെ കടയ്ക്കുള്ളിൽ നിന്ന് ശബ്ദം കേട്ടതിനെ തുടർന്ന് തൊട്ടടുത്ത വീട്ടിലെ വിനോദ് കടയിൽ ചെന്ന് നോക്കുമ്പോൾ വാതിൽ തുറന്ന നിലയിലായിരുന്നു.

ഉടൻ തന്നെ കടയുടമയെ വിവരം അറിയിച്ചു. ഉടമ വന്ന് നടത്തിയ പരിശോധനയിലാണ് കവർച്ച നടന്നതായി മനസിലായത്. ഇദ്ദേഹം കല്ലമ്പലം പൊലീസിൽ നൽകിയ പരാതിയിൽ പൊലീസ്, ഫിംഗർപ്രിന്റ്‌ വിദഗ്ദ്ധർ, ഡോഗ് സ്ക്വാഡ് സംയുക്തമായി നടത്തിയ പരിശോധനയിൽ പ്രതിയെക്കുറിച്ച് വ്യക്തമായ വിവരം ലഭിച്ചതായാണ് സൂചന.