അമ്പലപ്പുഴ: കാലവർഷം ശക്തിപ്രാപിച്ചതോടെ അമ്പലപ്പുഴയുടെ തീരത്ത് കടൽ കയറ്റം രൂക്ഷമായി. കൂറ്റൻ തിരമാലകൾ തീരവും കടന്ന് കരയിലേക്കെത്തിയതോടെ തകർച്ചാ ഭീഷണിയിലെത്തിയ രണ്ടു വീടുകൾ പൊളിച്ചു നീക്കി. മൂന്ന് കുടുംബങ്ങളെ മാറ്റിപാർപ്പിച്ചു. അമ്പലപ്പുഴ വടക്ക് പഞ്ചായത്ത് നീർക്കുന്നം പുതുവൽവീട്ടിൽ രമണൻ, പുതുവൽ ഷൈലജൻ എന്നിവരുടെ വീടുകളാണ് പൊളിച്ചു നീക്കിയത്. സമീപത്തെ മുരളി ഭവനിൽ മുരളിയുടെ വീട് തകർച്ചാ ഭീഷണിയിലാണ്. വെള്ളം കയറി ദുരിതത്തിലായ പുറക്കാട് പഞ്ചായത്ത് തോട്ടപ്പള്ളി ആനന്ദേശ്വരത്തെ മുള്ളു പറമ്പിൽ സുഗതൻ, ഗന്ധർവ്വൻ പറമ്പിൽ പ്രസന്ന, മുള്ളു പറമ്പിൽ രജനി എന്നിവരുടെ കുടുംബങ്ങളെ ഒറ്റപ്പന കരയോഗത്തിലേക്ക് മാറ്റി പാർപ്പിച്ചു. പുറക്കാട് പുന്തല മുതൽ അമ്പലപ്പുഴ വടക്ക് പഞ്ചായത്തിലെ നീർക്കുന്നം വരെയുളള തീരങ്ങളിൽ കഴിഞ്ഞ ഏതാനും ദിവസങ്ങളായി കടൽ കയറ്റം ശക്തമായിരുന്നു. എന്നാൽ തിങ്കൾ രാത്രിയോടെ കടൽ കൂടുതൽ ശക്തിയാർജ്ജിച്ചതോടെ നിരവധി വീടുകളിൽ വെള്ളം കയറി ജനജീവിതം ദുസഹമായി. കരയോഗ ത്തിലേക്ക് മാറ്റി പാർപ്പിച്ച കുടുംബങ്ങളെ എച്ച് .സലാം എം. എൽ. എ സന്ദർശിച്ചു. ഇവർക്ക് മതിയായ സഹായം ലഭ്യമാക്കണമെന്ന് വില്ലേജ് ഓഫീസർക്ക് നിർദ്ദേശം നൽകി. പുറക്കാട് പഞ്ചായത്ത് പ്രസിഡന്റ് എ. എസ് .സുദർശനൻ, സി.പി.ഐ ഏരിയ കമ്മിറ്റിയംഗം അജ്മൽ ഹസൻ എന്നിവർ ഒപ്പമുണ്ടായിരുന്നു.