മാവേലിക്കര: മാവേലിക്കരയിൽ യുവാവിനെ കനാലിൽ മരിച്ച നിലയിൽ കണ്ടെത്തി. പോനകം പുതുമംഗലത്ത് വി.രാജനെ (38)യാണ് മരിച്ച നിലയിൽ കണ്ടെത്തിയത്. 2 വർഷമായി ചെട്ടികുളങ്ങര ഈരേഴ വടക്ക് കണ്ണങ്കരയിൽ വാടകയ്ക്കു താമസിച്ചു വരി​കയായി​രുന്നു. വാടക വീടിനു കിഴക്കു മാറിയുള്ള ഉപകനാലിൽ ഇന്ന് രാവിലെ അഞ്ചു മണിയോടെയാണ് മൃതദേഹം കണ്ടത്. കഴിഞ്ഞ ദിവസം രാത്രി പ്രായിക്കരയിൽ ചൂണ്ട ഇടാൻ പോയി​രുന്നു. വീട്ടിലേക്കു ബൈക്കിൽ തിരികെ വരുമ്പോൾ ഇടുങ്ങിയ കോൺക്രീറ്റ് റോഡിൽ ബൈക്ക് തെന്നി മറിഞ്ഞ് സൈഡിലുള്ള കനാലിൽ തലയടിച്ചു വീണതാണെന്നാണ് പ്രാഥമിക നിഗമനം. മൃതദേഹം കമഴ്ന്നു കിടക്കുന്ന നിലയിലായിരുന്നു. ഫോറൻസിക് വിദഗ്ധർ സ്ഥലത്തെത്തി പരിശോധന നടത്തി. ഭാര്യ: രേഷ്മ. മക്കൾ: വേദിക, നിവേദിക. മരപ്പണിക്കാരനാണ് രാജൻ. മാവേലിക്കര പൊലീസ് നടപടി സ്വീകരിച്ചു.