ചേർത്തല:റോട്ടറി ക്ലബ് ഒഫ് ചേർത്തലയുടെ പുതിയ ഭാരവാഹികളായി പ്രസിഡന്റ് വയലിൻ ഫ്യൂഷൻ ആർട്ടിസ്​റ്റ് ബിജുമല്ലാരി, സെക്രട്ടറി ടി.സുമേഷ് ചെറുവാരണം,ട്രഷറർ ജയേഷ് വിജയൻ എന്നിവർ 9ന് സ്ഥാനമേൽക്കും. വൈകിട്ട് 6ന് റോട്ടറിഹാളിൽ നടക്കുന്ന ചടങ്ങിൽ റോട്ടറി ഡിസ്ട്രിക്ട് ഗവർണർ കെ.ബാബുമോൻ, മെഡി​റ്റേഷൻ പ്രമോട്ടർ ഹോളണ്ട് സ്വദേശിനി ലിയോണി എന്നിവർ മുഖ്യ അതിഥികളായി പങ്കെടുക്കും.സ്ഥാനാരോഹണത്തിന്റെ ഭാഗമായി വിവിധ സ്‌കൂളുകളിലെ 5 വിദ്യാർത്ഥിനികൾക്ക് സൗജന്യമായി സൈക്കിൾ വിതരണം ചെയ്യും.
ഈ വർഷത്തെ റോട്ടറി പദ്ധതികളായ അമൃതം,വാത്സല്യം,പരിണയം എന്നിവക്കും ഇതിനൊപ്പം തുടക്കമാകുമെന്ന് പ്രസിഡന്റ് ബിജുമല്ലാരി,അസിസ്​റ്റന്റ് ഗവർണർ ഡോ.കെ.ഷൈലമ്മ,സെക്രട്ടറി ടി.സുമേഷ് ചെറുവാരണം,ഡോ.വി.ശ്രീദേവൻ,സാംസൺ ജേക്കബ്ബ്,ബി.ശിവൻകുട്ടിനായർ എന്നിവർ വാർത്താ സമ്മേളനത്തിൽ അറിയിച്ചു.
നിർദ്ധന വിദ്യാർത്ഥികൾക്ക് സിവിൽ സർവീസ്,എം.ബി.ബി.എസ് പഠനാവസരം ഒരുക്കുക,അംഗപരിമിതരായവർക്ക് വിവാഹ സഹായം,സ്‌കൂളുകളിൽ കുട്ടികളുടെ കണ്ണ്,ചെവി,പല്ല് പരിശോധനാ ക്യാമ്പുകൾ നടത്തി വിദഗ്ദ ചികിത്സനടത്തുക തുടങ്ങിയ പദ്ധതികളാണ് ഏ​റ്റെടുക്കുന്നത്. ജൂലായ് ഒന്നിന് ഡോക്ടേഴ്സ് ദിനത്തിൽ വിവിധ മേഖലയിലെ ഡോക്ടർമാരെ ആദരിച്ചും രക്തദാനം നടത്തിയുമാണ് റോട്ടറി വർഷത്തെ പ്രവർത്തനങ്ങൾക്ക് തുടക്കം കുറിച്ചത്.സമ്മേളനത്തിനു ശേഷം ഓടക്കുഴൽ വാദകൻ രാജേഷ് ചേർത്തല,അഭിറാംബിജു,പിന്നണിഗായിക ഭാഗ്യലക്ഷ്മി,കലവൂർജയദേവ് എന്നിവർ നയിക്കുന്ന മ്യൂസിക്ക് ഷോയും ഉണ്ടാകും.