ആലപ്പുഴ: മക്കളെ കൊലപ്പെടുത്തിയ ശേഷം പൊലീസുകാരന്റെ ഭാര്യ ആത്മഹത്യ ചെയ്‌ത ആലപ്പുഴ എ.ആർ ക്യാമ്പ് ക്വാർട്ടേഴ്സിൽ അന്വേഷണസംഘം ഒളികാമറ കണ്ടെത്തി. മൊബൈൽഫോൺ​ കാമറയ്ക്ക് സമാനമായ കാമറയാണ് ക്വാർട്ടേഴ്സിലെ ഹാളിൽ സ്ഥാപി​ച്ചി​രുന്നത്. യുവതി​ ആത്മഹത്യ ചെയ്ത കി​ടപ്പുമുറി​യും കാമറയുടെ പരി​ധി​യി​ൽ വരും. മക്കളെ കൊന്ന് ഭാര്യ ആത്മഹത്യ ചെയ്യുന്നത് പൊലീസുകാരൻ തത്സമയം കണ്ടി​രി​ക്കാമെന്നും അന്വേഷണ സംഘം സംശയി​ക്കുന്നു.

സിവിൽ പൊലീസ് ഓഫീസറായ റെനീസ് ഭാര്യ നജല അറിയാതെയാണ് മുറിയിൽ കാമറ സ്ഥാപിച്ചത്. റെനീസി​ന്റെ മൊബൈൽ ഫോണി​ലൂടെ കാമറ ദൃശ്യങ്ങൾ കാണാം. ഫോണിലെ രേഖകൾ പൂർണമായി നശിപ്പിക്കപ്പെട്ടതിനാൽ ദൃശ്യങ്ങൾ വീണ്ടെടുക്കാൻ തൃപ്പൂണിത്തുറയിലെ ഫോറൻസിക് ലാബിന് കൈമാറി. പരിശോധനാ റിപ്പോർട്ട് ലഭിക്കുന്നതോടെ കാര്യങ്ങളിൽ വ്യക്തത വരുമെന്ന് ആലപ്പുഴ ഡി.സി.ആർ.ബി ഡിവൈ.എസ്.പി പറഞ്ഞു. കഴി​ഞ്ഞ മേയ് ഒമ്പതിനാണ് മക്കളായ ടിപ്പു സുൽത്താനെയും മലാലയെയും കൊലപ്പെടുത്തിയ ശേഷം നജല കിടപ്പുമുറിയിൽ തൂങ്ങി മരിച്ചത്. റെനീസിന്റെ നിരന്തര പീഡനവും പരസ്ത്രീ ബന്ധവുമാണ് ആത്മഹത്യക്ക് കാരണമെന്ന് കണ്ടെത്തിയിരുന്നു. കേസിന്റെ അന്വേഷണം പുരോഗമി​ക്കവേയാണ് മുറിയിൽ സ്ഥാപിച്ചിരുന്ന ചെറിയ കാമറ ഉദ്യോഗസ്ഥരുടെ ശ്രദ്ധയിൽപ്പെട്ടത്. നജലയുടെ നീക്കങ്ങൾ നിരീക്ഷിക്കാനാണ് കാമറ സ്ഥാപി​ച്ചതെന്ന് കരുതുന്നു. മരണം നടന്ന ദിവസം വൈകിട്ട് അഞ്ചി​ന് റെനീസിന്റെ കാമുകി ഷഹാന ക്വാർട്ടേഴ്സിലെത്തിയിരുന്നു. റെനീസിനൊപ്പം ഭാര്യയായി കഴിയാൻ തന്നെയും അനുവദിക്കണമെന്നായിരുന്നു ആവശ്യം. തുടർന്ന് ഇരുവരും വഴക്കിട്ടു. രാത്രി 10ന് ശേഷമായിരുന്നു കൂട്ടമരണം. ഈ സമയം ആലപ്പുഴ മെഡി. ആശുപത്രിയിലെ പൊലീസ് ഔട്ട് പോസ്റ്റിൽ രാത്രി ഷിഫ്റ്റിൽ ജോലിയിലായിരുന്നു റെനീസ്. ഫോറൻസിക് ഫലങ്ങൾ കൂടി ലഭിച്ച ശേഷം ഈ മാസം അവസാനത്തോടെ കോടതിയിൽ കുറ്റപത്രം സമർപ്പിക്കും.