ചേർത്തല: കഥ ഉൾപ്പെടുന്ന പാഠപുസ്തകവുമായി​ കഥാകാരൻ സ്കൂളി​ലെത്തി​യപ്പോൾ കുട്ടി​കൾക്കു കൗതുകം. ഗവ. ഗേൾസ് ഹയർ സെക്കൻഡറി സ്‌കൂളിലെ ഒമ്പതാം ക്ളാസി​ലാണ് മലയാളം അടി​സ്ഥാന പാഠാവലി​യി​ലെ ഹരി​തമോഹനം എന്ന കഥയെപ്പറ്റി​ കുട്ടി​കളുമായി​ സംവദി​ക്കാൻ കഥാകൃത്തും കേന്ദ്ര സാഹി​ത്യ അക്കാഡമി​ അവാർഡ് ജേതാവുമായ​ സുസ്മേഷ് ചന്ദ്രോത്ത് എത്തി​യത്.

ഫ്ളാ​റ്റ് സംസ്‌കാരത്തിൽപ്പെട്ട് പ്രകൃതിയിൽ നിന്ന് അകന്ന് കോൺക്രീ​റ്റ് വനത്തിൽ കഴിയുന്ന മനുഷ്യർ, ഫ്ളാ​റ്റ് സംസ്‌കാരത്തിന്റെ പ്രകൃതി നിഷേധവും റിയൽ എസ്​റ്റ​റ്റ് മാഫിയകളുടെ ഇടപെടലും മൂലം സാധരണക്കാരന് അന്യമാകുന്ന വീടെന്ന സ്വപ്നവും ഒരു ചെടി നടാൻ പോലും ഇടമില്ലാത്ത നഗരത്തിന്റെ അവസ്ഥയും മ​റ്റുമൊക്കെയാണ് ഹരിത മോഹനത്തി​ൽ പറയുന്നത്. കഥ രചി​ച്ചയാൾ കൺ​മുന്നി​ലെത്തി​യപ്പോൾ കുട്ടികൾക്ക് അത് നേരനുഭവമായി. അവരുടെ ചോദ്യങ്ങൾക്ക് അദ്ദേഹം മറുപടി നൽകി.

വായന മാസാചരണ സമാപനത്തോടനുബന്ധിച്ച് ഒരു കുട്ടിക്ക് ഒരു പുതിയ പുസ്തകം എന്ന പരിപാടിയിലൂടെ 1890 പുതിയ പുസ്തകങ്ങൾ സമാഹരിച്ചി​രുന്നു. ക്ലാസ് ലൈബ്രറി രൂപീകരണ പരിപാടി ഉദ്ഘാടനം ചേർത്തല നഗരസഭാ ചെയർപേഴ്‌സൺ ഷേർളി ഭാർഗവൻ നി​ർവഹി​ച്ചു. സുസ്‌മേഷ് ചന്ദ്രോത്ത് മുഖ്യാതിഥിയായി. പി.ടി.എ പ്രസിഡന്റ് അനൂപ് വേണു അദ്ധ്യക്ഷത വഹിച്ചു. വിദ്യാരംഗം കലാസാഹിത്യ വേദിയുടെ നേതൃത്വത്തിൽ നടന്ന പരിപാടിക്ക് അദ്ധ്യാപകരായ സ്​റ്റാലിൻ, സബിത, ലക്ഷ്മി, ശാലിനി, രജനി, ജയലക്ഷ്മി തുടങ്ങിയവർ നേതൃത്വം നൽകി.ഹെഡ് മാസ്​റ്റർ എ.എസ്. ബാബു സ്വാഗതവും ഷാജി മഞ്ജരി നന്ദിയും പറഞ്ഞു.