 ബസ് സർവീസ് നിലച്ചത് നാടിന് ദുരിതമായി

ചേർത്തല: തണ്ണീർമുക്കം ഗ്രാമപഞ്ചായത്തിലെ പ്രധാന റോഡുകളിൽ ഒന്നായ ചാലിപ്പള്ളി-സ്കൂൾ കവല റോഡ് തകർന്ന് താറുമാറായതോടെ നാടി​ന്റെ ആശ്രയമായി​രുന്ന മൂന്ന് സ്വകാര്യബസുകൾ ഓട്ടം മതി​യാക്കി​. ഇതോടെ യാത്രാക്ളേശത്താൽ നരകി​ക്കുകയാണ് ജനം.

14,15 വാർഡുകളിലൂടെ കടന്നു പോകുന്ന റോഡിനാണ് വർഷങ്ങളായി ഈ ദുർഗതി. വശങ്ങൾ തകർന്നു കുണ്ടും കുഴിയുമായ റോഡിൽ ഇരുചക്രവാഹനങ്ങളും സൈക്കിളുകളും അപകടത്തിൽപ്പെടുന്നത് പതി​വാണ്. ആകെ രണ്ടര കിലോമീറ്റർ ദൂരമുള്ള റോഡിലെ ഒന്നര കിലോമീറ്ററും തകർന്ന നിലയിലാണ്. ചേർത്തല -തണ്ണീർമുക്കം റോഡിന് സമാന്തര പാതയാണിത്. മഴക്കാലമായതോടെ അപകടങ്ങൾ കൂടി​. ചേർത്തലയേയും-സ്കൂൾ കവലയേയും ബന്ധിപ്പിക്കുന്ന, പഞ്ചായത്തിലെ പ്രധാന റോഡുകൂടി​യാണി​ത്. സർവീസ് അവസാനിപ്പിച്ച സ്വകാര്യബസുകൾ അടുത്തകാലത്തെങ്ങും ഇതുവഴി വരാൻ സാദ്ധ്യതയില്ലെന്നു നാട്ടുകാർ പറയുന്നു.

വർഷങ്ങളായി അറ്റകുറ്റപ്പണി നടത്താത്തതാണ് തകർച്ചയ്ക്ക് ആക്കം കൂട്ടിയത്. വശങ്ങളിൽ കാടു കയറുന്നതും യാത്രയ്ക്ക് ബുദ്ധിമുട്ടുണ്ടാക്കുന്നു. പാമ്പുശല്യവും രൂക്ഷമായി​. പ്രദേശത്തെ സ്വകാര്യ സ്കൂളിലേക്ക് സ്കൂൾ ബസുകൾ ഉൾപ്പെടെ വളരെ പണിപ്പെട്ടാണ് സഞ്ചരിക്കുന്നത്. ഓട്ടോറിക്ഷകൾ പോലും ഇതുവഴി​ എത്താൻ മടി​ക്കുക്കു. ചേർത്തലയിൽ നിന്ന് ആലപ്പുഴ-തണ്ണീർമുക്കം റോഡിൽ പ്രവേശിക്കാനുള്ള ഏക മാർഗവും ഇതാണ്. കൊവിഡ് കാലത്ത് റോഡുകൾ എല്ലാം പൂർണമായി അടച്ചപ്പോഴും കോട്ടയം മെഡി. ആശുപത്രി​യി​ലേക്കുൾപ്പെടെ രോഗികൾക്കും മറ്റുള്ളവർക്കും സഞ്ചരിക്കാനുള്ള മാർഗമായിരുന്നു ഈ റോഡ്. പഞ്ചായത്തിലെ മറ്റ് റോഡുകളെല്ലാം പുനർ നിർമ്മിച്ചെങ്കിലും ചാലിപ്പള്ളി-സ്കൂൾ കവല റോഡി​ന് അവഗണന മാത്രം.

..................

നൂറുകണക്കിന് യാത്രക്കാർ സഞ്ചരിക്കുന്ന പ്രധാന റോഡാണ് ചാലിപ്പള്ളി-സ്കൂൾ കവല റോഡ്. നിരവധി സ്കൂൾ കുട്ടികൾ ഉൾപ്പെടെ ഈ റോഡിനെയാണ് ആശ്രയിക്കുന്നത്. പഞ്ചായത്തിലെ എല്ലാ റോഡുകളും പുനർ നിർമ്മിച്ചിട്ടും പ്രധാന റോഡായ
ഇതിനെതിരെ അധികൃതർ കാട്ടുന്ന അനീതി പ്രതിഷേധാർഹമാണ്. അടിയന്തിരമായി പുനർ നിർമ്മിക്കണം.

സിദ്ധാർത്ഥൻ, മണവേലി (നാട്ടുകാരൻ)