ആലപ്പുഴ: എ.സി റോഡ് നവീകരണത്തിന്റെ ഭാഗമായി ക്രോസ് വേകളിൽ ഗർഡറുകൾ സ്ഥാപിക്കുന്ന ജോലികൾ പുരോഗമിക്കുന്നു. മഴക്കാലത്ത് തുടർച്ചയായി വെള്ളക്കെട്ടുണ്ടാകുന്ന ഭാഗങ്ങളിലാണ് ക്രോസ്‌വേ നിർമ്മിക്കുന്നത്. റോഡിൽ നിന്ന് ഒന്നര മീറ്റർ ഉയരത്തിലാണ് നിർമ്മാണം. മാമ്പുഴക്കരി, നെടുമുടി പാലങ്ങൾക്ക് കിഴക്കുവശത്തും പൂപ്പള്ളി ജംഗ്ഷനിലും ക്രോസ്‌വേ നിർമ്മിക്കാനാണ് പദ്ധതി.

ഗർഡറുകൾ സ്ഥാപിക്കുന്നതുമായി ബന്ധപ്പെട്ട് ഗതാഗത നിയന്ത്രണവും ഏർപ്പെടുത്തിയിട്ടുണ്ട്. ഇതോടെ ഗതാഗതക്കുരുക്കും രൂക്ഷമായി. പകലും രാത്രിയിലും ഇതു വഴിയുള്ള യാത്ര ദുരിതപൂർണമാണ്. മഴയിൽ പല ഭാഗങ്ങളും വെള്ളക്കെട്ടാവുകയും ചെയ്തു. കിടങ്ങറ, നെടുമുടി എന്നിവിടങ്ങളിൽ സമാന്തര പാലത്തിന്റെയും മങ്കൊമ്പ് ബ്ലോക്ക് – ഒന്നാംകര ഭാഗത്തും മങ്കൊമ്പ് തെക്കേക്കര, ജ്യോതി ജംഗ്ഷൻ – പാറശേരി ഭാഗത്തുമുള്ള മേൽപ്പാലങ്ങളുടെയും ജോലികൾ പുരോഗമിക്കുകയാണ്. നെടുമുടി പാലത്തിന്റെ ഇരുകരകളിലേക്കുള്ള അപ്രോച്ച് പാലങ്ങളുടെ കോൺക്രീറ്റ് ജോലികൾ പൂർത്തിയായി. പ്രധാന പാലത്തിന്റെ ബീമിന്റെ ജോലികൾ അന്തിമഘട്ടത്തിലാണ്. നെടുമുടി പാലത്തിന്റെ പടിഞ്ഞാറുഭാഗത്തെ അപ്രോച്ച് പാലം ഗതാഗതത്തിന് തുറക്കു കൊടുത്തു. സമാന്തര പാലത്തിന്റെ കോൺക്രീറ്റ് ജോലി ഉടൻ പൂർത്തിയാവും.

# ചട്ടത്തിൽ തട്ടി പള്ളാത്തുരുത്തി പാലം

പള്ളാത്തുരുത്തിയിൽ പുതിയ പാലത്തിന്റെ പുതിയ രൂപരേഖയ്ക്ക് ദേശീയ ജലപാത അതോറിട്ടിയുടെ അനുമതി ലഭിച്ചിട്ടും നിറുത്തി വച്ച പൈലിംഗ് ജോലികൾ പുനരാംരംഭിച്ചില്ല. ജനുവരിയിൽ ആരംഭിച്ച പൈലിംഗ് ജോലികൾ ദേശീയജലപാത അതോറിട്ടിയുടെ ചട്ടം ലംഘിച്ചുവെന്നതിനാൽ ഫെബ്രുവരിയിൽ നിറുത്തിവയ്‌ക്കേണ്ടി വന്നു. നിലവിലെ പാലത്തിന് സമാന്തരവായി അതേ നീളത്തിലും വീതിയിലും പാലം നിർമ്മിക്കാൻ തയ്യാറാക്കിയ ഡിസൈനിന്റെ അടിസ്ഥാനത്തിലാണ് പൈലിംഗ് ജോലികൾ തുടങ്ങിയത്. ദേശീയ ജലപാതയ്ക്ക് കുറകേയുള്ള നിർമ്മാണത്തിന് ഉൾനാടൻ ജലപാത അതോറിട്ടിയുടെ അനുമതി വാങ്ങിയിരുന്നില്ല. ഒരേസമയം രണ്ട് ബാർജുകൾക്ക് കടന്നുപോകാനുള്ള വീതിയിൽ പാലത്തിന്റെ തൂണുകൾ തമ്മിലുള്ള അകലം ക്രമീകരിച്ചാണ് പുതിയ ഡിസൈൻ തയ്യാറാക്കിയത്. ഇതനുസരിച്ച് അപ്രോച്ച് റോഡിന്റെയും സമീപപാതയുടെയും ഉയരം കൂട്ടിയാണ് നിർമ്മാണം. ഇപ്പോഴത്തെ പാലത്തിന്റെ രണ്ട് തൂണുകൾ തമ്മിലുള്ള അകലം 29 മീറ്ററാണ്. നിലവിലെ നിയമപ്രകാരം അകലം 40 മീറ്റർ വേണം. പ്രളയകാലത്തെ ജലനിരപ്പിൽ നിന്ന് ആറ് മീറ്റർ ഉയരവും ഉണ്ടാകണം.

.........................

പുതിയ ഡിസൈനിന് ദേശീയ ജലപാത അതോറിട്ടിയുടെ അനുമതി ലഭിച്ചതിനാൽ പള്ളാത്തുരുത്തിയിൽ പൈലിംഗ് ജോലികൾ വൈകാതെ പുനരാരംഭിക്കും. എ.സി റോഡിലെ മറ്റ് ഭാഗങ്ങളിൽ ക്രോസ് വേ ഉൾപ്പെടെയുള്ള ജോലികൾ വേഗത്തിൽ പുരോഗമിക്കുന്നുണ്ട്

അസി. എക്‌സിക്യുട്ടീവ് എൻജിനീയർ