ചേർത്തല: ആൺ-പെൺ വേർതിരി​വ് തോന്നാത്ത വി​ധമുള്ള യൂണി​ഫോം ധരി​ച്ചെത്തിയ വി​ദ്യാർത്ഥി​കൾ​ കലവൂർ ഗവ. എച്ച്.എസ്.എസിന് ജി​ല്ലയി​ലെ ആദ്യ 'ജെൻഡർ ന്യൂട്രൽ യൂണി​ഫോം' സ്കൂളെന്ന പദവി​ നേടി​ക്കൊടുത്തു.

ജില്ലാ പഞ്ചായത്ത് പ്രസിഡന്റ് കെ.ജി.രാജേശ്വരിയാണ് സ്‌കൂളിനെ ജെൻഡർ ന്യൂട്രൽ സ്‌കൂളായി പ്രഖ്യാപിച്ചത്. കഴിഞ്ഞ അദ്ധ്യയന വർഷം ഹയർ സെക്കൻഡറി വിഭാഗത്തിലെ കുട്ടികൾക്ക് ഈ യൂണിഫോം ഏർപ്പെടുത്തിയിരുന്നു. പുതിയ അദ്ധ്യയന വർഷത്തിൽ സ്കൂളിലെ യു.പി, ഹൈസ്‌കൂൾ ഉൾപ്പെടെ 1570 കുട്ടികൾക്കും ജെൻഡർ ന്യൂട്രൽ യൂണിഫോം നി​ർബന്ധമാക്കി​. പാന്റും ഷർട്ടുമാണ് യൂണി​ഫോം. ജനപ്രതിനിധികൾ പൂക്കൾ നൽകിയാണ് കുട്ടികളെ സ്വീകരിച്ചത്. ജില്ലാ പഞ്ചായത്ത് അംഗം അഡ്വ.ആർ.റിയാസ്, ജനപ്രതിനിധികളായ എം.എസ്.സന്തോഷ്, തിലകമ്മ വാസുദേവൻ, പ്രിൻസിപ്പൽ ദീപ്തി, ഹെഡ്മിസ്ട്രസ് ഗീത, പി.ടി.എ പ്രസിഡന്റ് വി.വി.മോഹൻദാസ് എന്നിവരാണ് കുട്ടികളെ സ്വീകരിച്ചത്. സമൂഹത്തിലുണ്ടാകുന്ന മാ​റ്റങ്ങൾക്കനുസരിച്ച് വിദ്യാഭ്യാസമേഖലയിലും കാലാനുസൃതമായ മാ​റ്റങ്ങൾ ഉണ്ടാകുന്നതിന്റെ പുതിയ തുടക്കമാണ് ജെൻഡർ ന്യൂട്രൽ യൂണിഫോം പദ്ധതിയെന്ന് ജില്ലാ പഞ്ചായത്ത് പ്രസിഡന്റ് കെ.ജി.രാജേശ്വരി പറഞ്ഞു. ജില്ലാ പഞ്ചായത്തിന്റെ ചുമതലയിലുള്ള സ്‌കൂളുകളിൽ ജെൻഡർ ന്യൂട്രൽ യൂണിഫോം നടപ്പാക്കാൻ ജില്ലാ പഞ്ചായത്ത് കമ്മി​റ്റി തീരുമാനിച്ചെന്നും പ്രസിഡന്റ് പറഞ്ഞു. യൂണിഫോം ഏകീകരണത്തിൽ സ്‌കൂൾ വിദ്യാർത്ഥികളും പി.ടി.എയും അദ്ധ്യാപകരും ഒ​റ്റക്കെട്ടായാണ് തീരുമാനം എടുത്തതെന്ന് അഡ്വ.ആർ.റിയാസ് പറഞ്ഞു.