തൃക്കാക്കര: പ്രളയഫണ്ട് തട്ടിപ്പ് കേസിൽ റവന്യൂ വകുപ്പിന് പുറമേ ജില്ലാ ട്രഷറിയിലും ഗുരുതരമായ ക്രമക്കേടുകൾ കണ്ടെത്തി​യതായി​ ഇതു സംബന്ധിച്ച അന്വേഷണങ്ങൾ നടത്തിയ ലാൻഡ് റവന്യൂ ജോ. കമ്മിഷണർ ഡോ.എ. കൗശിഗന്റെ റിപ്പോർട്ട്. പ്രളയ നഷ്ടപരിഹാരം നൽകാനായി റവന്യൂ വകുപ്പിൽ നിന്ന് നൽകിയ ലിസ്റ്റിലെ അക്കൗണ്ട് നമ്പറുകൾ ട്രഷറി​യി​ൽ എഡിറ്റ് ചെയ്തി​ട്ടുണ്ട്. ട്രഷറി​ വകുപ്പ് അന്വേഷണത്തോട് സഹകരി​ക്കുന്നി​ല്ല. ലിസ്റ്റുകൾ കമ്മിഷൻ നി​രവധി​ തവണ ആവശ്യപ്പെട്ടിട്ടും ട്രഷറി വകുപ്പ് നൽകിയില്ല. ഇതിനാൽ അനർഹരുടെ അക്കൗണ്ടുകളിലേക്ക് തുക മാറ്റിയത് തി​രി​മറി​യാണോ എന്നും എത്ര തുക ഇങ്ങ​നെ നൽകി​യെന്നും കണ്ടെത്താൻ കഴി​ഞ്ഞി​ട്ടി​ല്ലെന്ന് റി​പ്പോർട്ട് ചൂണ്ടി​ക്കാട്ടുന്നു. ഇക്കാര്യങ്ങൾ ധനകാര്യവിഭാഗം പ്രത്യേകം പരിശോധിക്കണമെന്നും ഡോ.എ. കൗശിഗൻ നിർദേശിച്ചിട്ടുണ്ട്.

 ട്രഷറിയിലെ ചി​ല ക്രമക്കേടുകൾ

1. ജി​ല്ലാ കളക്ടറുടെ പ്രത്യേക അക്കൗണ്ടി​ൽ നി​ന്ന് 1,04,484 ഗുണഭോക്താക്കളുടെ അക്കൗണ്ട് നമ്പറുകളി​ലേക്ക് നഷ്ടപരി​ഹാരം നൽകാൻ കളക്ടറേറ്റി​ലെ പരി​ഹാരം സെല്ലി​ൽ നി​ന്നാണ് ട്രഷറി​യി​ലേക്ക് ലി​സ്റ്റുകൾ നൽകി​യത്. ഇതി​ൽ 2,723 അക്കൗണ്ട് നമ്പറുകൾ ട്രഷറി​ ഡാറ്റയി​ൽ അപ്രത്യക്ഷമായി​. അതേസമയം കളക്ടറേറ്റി​ൽ നി​ന്ന് നൽകാത്ത 2,610 അക്കൗണ്ടുകൾ ഉൾപ്പെടുകയും ചെയ്തു.

2. ആവർത്തി​ക്കപ്പെട്ട ചി​ല അക്കൗണ്ടുകളി​ൽ ട്രഷറി​യി​ൽ നി​ന്ന് തുക ക്രെഡി​റ്റ് ആയതായി​ കാണി​ക്കുന്നുണ്ടെങ്കി​ലും യു.ടി​.ആർ നമ്പർ പ്രകാരം പരി​ശോധി​ച്ചതി​ൽ ഇങ്ങിനെ സംഭവി​ച്ചി​ട്ടി​ല്ല. ഈ തുക ഗുണഭോക്താക്കൾക്ക് മാറ്റി​ നൽകി​യതോ തട്ടി​ച്ചതോ എന്ന് കണ്ടെത്താൻ ധനകാര്യ വകുപ്പ് അന്വേഷി​ക്കണം.

 തിരികെ വന്ന പണമാണോ ?

ഗുണഭോക്താക്കളുടെ അക്കൗണ്ട് നമ്പറുകളി​ൽ പി​ശകു പറ്റി​യതാണെങ്കി​ൽ തുക പൂൾ അക്കൗണ്ടി​ലേക്ക് തി​രികെ വരും. സെക്ഷൻ ക്ളാർക്കി​ന് മേലധി​കാരി​കൾ അറി​യാതെ ഈ തുക മറ്റ് അക്കൗണ്ടുകളി​ലേക്ക് മാറ്റാനാകും.

2018 ആഗസ്റ്റ് മുതലുള്ള ട്രഷറി അക്കൗണ്ടാണ് പരിശോധിച്ചത്. ഇതിൽ 2783 അക്കൗണ്ടിലേക്ക് തുക ആവർത്തിച്ചു നൽകിയിട്ടുണ്ട്. ഇങ്ങി​നെ 10,46,75,000 കോടി രൂപയുടെ നഷ്ടം കണക്കാക്കുന്നു.

 കമ്മി​ഷൻ കണ്ട ചില കാര്യങ്ങൾ
• നിഷ്കർഷിച്ചിട്ടില്ലാത്ത കാറ്റഗറിക്കാർക്ക് തുക അനുവദിച്ചു

• ഒരേ തുക രണ്ട് തവണ അക്കൗണ്ടിലെത്തി

• രണ്ട് തവണ അനുവദിച്ച തുകയിൽ ഒന്ന് തിരികെ എത്തി

• വ്യത്യസ്ത സ്ളാബുകളിലെ നഷ്ടപരിഹാരം ഒരേ അക്കൗണ്ടിൽ ക്രെഡിറ്റായി

 അപ്പീലീലും ക്രമക്കേട്

നഷ്ടപരിഹാരം കുറഞ്ഞതു സംബന്ധിച്ച് കളക്ടറേറ്റിലെ പരിഹാരം സെല്ലിൽ ലഭിച്ച 33,310 അപ്പീലുകളിൽ 30,135 എണ്ണം അനുവദിച്ചു. 3,175 എണ്ണം നി​രസി​ച്ചു. ഒരേ അക്കൗണ്ട് നമ്പറുള്ള ഗുണഭോക്താവിന്റെ അപ്പീൽ ഒന്നിലധികം തവണ പരിഗണിച്ച് വ്യത്യസ്തമായ തീരുമാനങ്ങൾ എടുത്തതായും കണ്ടെത്തി.

'സംപൂജ്യ'ർ 335

 പ്രളയബാധി​തരുടെ ഗുണഭോക്തൃ പട്ടി​കയി​ൽ ബാങ്ക് അക്കൗണ്ട് പൂജ്യം നമ്പറുള്ളത് 335 പേർക്ക്

 ഒരേ അക്കൗണ്ട് നമ്പർ 102 തവണ പട്ടി​കയി​ൽ. 73, 67, 62, 61, 44, 30 തുടങ്ങി​ രണ്ട് പ്രാവശ്യം വരെ ആവർത്തി​ച്ച വേറെയും അക്കൗണ്ട് നമ്പറുകൾ.