കൊച്ചി​: പാവപ്പെട്ട രോഗികൾക്ക് സൗജന്യചികിത്സ നൽകാൻ കളമശേരി മെഡിക്കൽ കോളേജിൽ 'മദദ് ഫണ്ട് ' സ്വരൂപി​ക്കുന്നു. ആദ്യസംഭാവനയായി കളക്ടർ 25,000 രൂപ നൽകി. അഗതികൾക്കും പാവപ്പെട്ടവർക്കും അന്യസംസ്ഥാന തൊഴിലാളികൾക്കും അടിയന്തര ഘട്ടത്തിൽ സൗജന്യചികിത്സ ഉറപ്പാക്കുന്നതിനാണ് സംഭാവനകൾ സ്വീകരിച്ച് മദദ് ഫണ്ട് സ്വരൂപി​ക്കുന്നത്.

മന്ത്രി പി. രാജീവിന്റെ അദ്ധ്യക്ഷതയിൽ ചേർന്ന മെഡിക്കൽ കോളേജ് വികസന സൊസൈറ്റിയോഗം പദ്ധതിക്ക് അനുമതിനൽകി​. ഒരു വർഷത്തേയ്ക്കുള്ള പദ്ധതി​കളും യോഗം അംഗീകരിച്ചു.

ഹൈബി ഈഡൻ എം.പി, മെഡിക്കൽ സൂപ്രണ്ട് ഡോ. എം. ഗണേഷ് മോഹൻ, ഡെപ്യൂട്ടി മെഡിക്കൽ സൂപ്രണ്ട് ഗീതാ നായർ തുടങ്ങി​യവർ യോഗത്തിൽ പങ്കെടുത്തു.

നടപ്പാക്കുന്ന പദ്ധതി​കൾ

 വി​വി​ധ വിഭാഗങ്ങൾ എവിടെയാണെന്ന് എളുപ്പം മനസിലാകുന്ന വിധം ഇന്ററാക്ടീവ് ഫെസിലിറ്റി മാപ്പ് സംവിധാനമുണ്ടാക്കും.

 24 മണിക്കൂറും പ്രവർത്തിക്കുന്ന ഫാർമസി​, കാന്റീൻ, യൂട്ടിലിറ്റി സ്‌റ്റോർ

 വിഷബാധയേറ്റ് വരുന്നവരുടെ സാമ്പിളുൾ പരിശോധിക്കാൻ ടോക്‌സിക്കോളജി ലാബ്

 അൾട്രാസൗണ്ട് സ്‌കാനിംഗ് സൗകര്യം 24 മണിക്കൂർ ലഭ്യമാക്കും.

 ജീവനക്കാർക്ക് ബിഹേവിയർ ആൻഡ് മോട്ടിവേഷണൽ ട്രെയിനിംഗ്. എല്ലാ മാസവും രണ്ട് ക്ലാസ് വീതം ഉണ്ടാകും. ആശുപത്രിയുടെ സേവനം കൂടുതൽ മികച്ചതാക്കുകയാണ് ലക്ഷ്യം.

 എംപ്ളോയ്മെന്റ് വഴി​ 50 നഴ്‌സുമാരെയും 40 ക്ലീനിംഗ് ജീവനക്കാരെയുമുൾപ്പെടെ 160 പേരെ നിയമിക്കും.

 ആശുപത്രി വികസന സൊസൈറ്റി ജീവനക്കാരുടെ ശമ്പളം 2022 ഏപ്രിൽ മുതൽ മുൻകാല പ്രാബല്യത്തോടെ പത്തുശതമാനം വർദ്ധിപ്പിക്കും.

 കൊവിഡ് രോഗി​കളുടെ മൃതദേഹങ്ങൾ കൈകാര്യംചെയ്തവർക്ക് പ്രത്യേകതുക.

 ഒ.പി ടിക്കറ്റ് നിരക്ക് 5 രൂപയായും ബെഡ് ചാർജ് 20 രൂപയായും വർദ്ധി​പ്പി​ച്ചു. പേവാർഡ്, ആംബുലൻസ്, പാർക്കിംഗ് (ഓട്ടോ, ടാക്‌സി) നിരക്കുകളിൽ മാറ്റമില്ല.