പറവൂർ: സൈനിക സിലബസുള്ള ഇളന്തിക്കര ശ്രീശാരദ വിദ്യാമന്ദിർ സ്കൂളിന്റെ പേര് ജനറൽ ബിബിൻ റാവത്ത് സൈനിക സംസ്കൃതി സ്കൂളെന്ന് പുനർനാമകരണം ചെയ്യും. മുൻ സംയുക്ത സേനാ മേധാവി ജനറൽ ബിബിൻ റാവത്തിനോടുള്ള ആദരസൂചകമായാണു പേര് മാറ്റുന്നത്. സ്കൂളിന്റെ പുതിയ അക്കാഡമിക് ബ്ലോക്ക് ഗാൽവൻ താഴ്‌വരയിൽ വീരമൃത്യു വരിച്ച സൈനികരുടെ സ്മാരക മന്ദിരമായി സമർപ്പിക്കും. നാമകരണവും മന്ദിരം സമർപ്പണവും നാളെ രാവിലെ 11.30 നു കേന്ദ്ര പ്രതിരോധ സഹമന്ത്രി അജയ് ഭട്ട് നിർവഹിക്കും. പ്രതിപക്ഷനേതാവ് വി.ഡി. സതീശൻ അദ്ധ്യക്ഷത വഹിക്കും. ഹൈബി ഈഡൻ എം.പി. മുഖ്യാഥിതിയായിരിക്കും. സ്വാമി ധർമ്മചൈതന്യ, ഫാ. ജോസഫ് കാരിക്കശ്ശേരി, ടി.വി. പ്രദീഷ്, റോസി ജോഷി, സ്കൂൾ ചെയർമാൻ കെ.കെ. അമരേന്ദ്രൻ, പ്രിൻസിപ്പൽ എൻ. ശ്രീലക്ഷ്മി തുടങ്ങിയവർ സംസാരിക്കും.