കോലഞ്ചേരി: രണ്ടരമാസം പ്രായമുള്ള പെൺകുഞ്ഞ് മുലപ്പാൽ തൊണ്ടയിൽ കുടുങ്ങി മരിച്ചു. കിടങ്ങൂർ വടശ്ശേരിമന ഹരികൃഷ്ണൻ എൻ. നമ്പൂതിരിയു‌ടെ (ഹരികുമാർ) മകളാണ് മരിച്ചത്. വിവിധ അമ്പലങ്ങളിൽ മുട്ടുശാന്തിയായി ജോലി നോക്കുകയും ഒപ്പം പാങ്കോട്ടിൽ ശ്രീസുബ്രഹ്മണ്യസ്വാമി ക്ഷേത്രത്തിന് സമീപം ജ്യോതിഷാലയവും നടത്തുന്ന ഹരികുമാർ ഇവിടെ രണ്ടുമാസമായി വാടകയ്ക്ക് താമസിക്കുകയാണ്. അഞ്ചാമത്തെ കുട്ടിയാണ്. വ്യാഴാഴ്ച പുലർച്ചെ 12.30 ഓടെ മുലപ്പാൽ നൽകിയശേഷം ഉറക്കി കിടത്തിയതാണ്. 4.30 ഓടെ കുട്ടിക്ക് വീണ്ടും മുലപ്പാൽ നൽകാൻ വിളിച്ചുണർത്തുമ്പോൾ അബോധാവസ്ഥയിലായിരുന്നു. ഉടൻ കോലഞ്ചേരി മെഡിക്കൽ കോളേജിൽ എത്തിച്ചെങ്കിലും ജീവൻ രക്ഷിക്കാനായില്ല. രാമമംഗലം മേമുറി ആര്യപ്പിള്ളി മനയിൽ ശ്രീദേവിയാണ് അമ്മ. പുത്തൻകുരിശ് പൊലീസ് മേൽനടപടികൾ സ്വീകരിച്ചു. പോസ്റ്റ്‌മോർട്ടത്തിന് ശേഷം സംസ്‌കാരം നടത്തി.