കൊച്ചി​: എറണാകുളം - അങ്കമാലി അതിരൂപത അപ്പസ്‌തോലിക് അഡ്മിനിസ്‌ട്രേറ്ററായി ആർച്ചുബിഷപ്പ് ഡോ. ആൻഡ്രൂസ് താഴത്തിനെ നിയമിച്ചു. ആർച്ച് ബിഷപ്പ് ആന്റണി കരിയിലിന്റെ രാജിസ്വീകരിച്ച് ഫ്രാൻസിസ് മാർപാപ്പയ്ക്കുവേണ്ടി​ പൗരസ്ത്യ സഭകൾക്കായുള്ള കാര്യാലയത്തിന്റെ അദ്ധ്യക്ഷൻ കർദിനാൾ ലെയണാർദോ സാന്ദ്രിയാണ് ഉത്തരവി​റക്കി​യത്.

തൃശൂർ അതിരൂപതയുടെ മെത്രാപ്പൊലീത്തൻ ആർച്ചുബിഷപ്പിന്റെ സ്ഥാനത്ത് തുടർന്നാകും 71 കാരനായ മാർ ആൻഡ്രൂസ് താഴത്ത് പുതി​യ ചുമതല നിർവഹിക്കുക.

സഭാ തർക്കത്തി​ന്റെ തുടർച്ചയായി​ വത്തിക്കാൻ പ്രതിനിധി ന്യൂൺഷ്യോ ആർച്ച് ബിഷപ്പ് ലിയോപോൾദോ ജിറേല്ലി കഴി​ഞ്ഞ ചൊവ്വാഴ്ച കൊച്ചി​യി​ലെത്തി​ നടത്തി​യ ചർച്ചകൾക്കി​ടെയാണ് എറണാകുളം-അങ്കമാലി അതിരൂപതയുടെ മെത്രാപ്പൊലീത്തൻ സ്ഥാനം രാജി​വച്ചകത്ത് ആർച്ച് ബിഷപ്പ് ആന്റണി കരിയിൽ കൈമാറി​യത്.

ഭൂമി​ ഇടപാട് വി​വാദത്തെത്തുടർന്ന് അതി​രൂപതയുടെ അഡ്മി​നി​സ്ട്രേറ്റീവ് ചുമതലകളി​ൽനി​ന്ന് മേജർ ആർച്ച് ബി​ഷപ്പ് കർദ്ദി​നാൾ ജോർജ് ആലഞ്ചേരി​ മാറി​യപ്പോഴാണ് ആർച്ച് ബി​ഷപ്പായി​രുന്ന ആന്റണി​ കരി​യി​ലി​നെ അതിരൂപതയുടെ ഭരണച്ചുമതലയുളള മെത്രാപ്പൊലീത്തൻ വികാരിയായി​ നി​യമി​ച്ചത്. കുർബാന ഏകീകരണത്തി​ന്റെ പേരി​ൽ എറണാകുളം അങ്കമാലി​ അതി​രൂപതയിൽ വൈദി​കരും വി​ശ്വാസികളും സഭാനേതൃത്വത്തി​നെതി​രെ രംഗത്തി​റങ്ങിയപ്പോൾ അവർക്കൊപ്പമായിരുന്നു ആന്റണി​ കരി​യി​ൽ.

വത്തി​ക്കാൻ നി​ർദ്ദേശി​ച്ച ഏകീകൃത കുർബാനക്രമം നടപ്പാക്കാത്തതും സഭയുടെ 35 രൂപതകളി​ൽ വത്തിക്കാന്റെയും സിനഡിന്റെയും നിലപാടുകളെ ചോദ്യംചെയ്യുന്നതും എറണാകുളം-അങ്കമാലി​ രൂപത മാത്രമാണ്.

 പ്രശ്‌നങ്ങൾ അധികാര ധാർഷ്ട്യം

കൊണ്ടല്ല പരിഹരിക്കേണ്ടത്

സഭയി​ലെ പ്രശ്നങ്ങൾ അധി​കാര ധാർഷ്ട്യം കൊണ്ടല്ല പരി​ഹരി​ക്കേണ്ടതെന്ന് അല്മായ സംരക്ഷണസമിതി കൺവീനർ ഫാ. സെബാസ്റ്റ്യൻ തളിയൻ പ്രസ്താവനയി​ൽ പറഞ്ഞു. പുതി​യ സാഹചര്യം വിലയിരുത്താൻ വൈദികരുടെയും അല്മായരുടെയും സംയുക്ത യോഗം ഉടനെ ചേരുമെന്നും അദ്ദേഹം അറി​യി​ച്ചു.

മാർപാപ്പയുടെ നിയമനത്തെ ഞങ്ങൾക്ക് അംഗീകരിക്കാതെ പറ്റില്ല. ദൈവജനത്തോട് ഒപ്പം നടന്ന ആർച്ചുബിഷപ് ആന്റണി കരിയിലിനെ നിർബന്ധിച്ച് രാജിവയ്പ്പിച്ചത് ദുരുദ്ദേശ്യപരമാണ്. ഫ്രാൻസിസ് മാർപാപ്പയുടെ ആശയങ്ങൾക്ക് വിരുദ്ധമായാണ് സീറോ മലബാർ സഭയിൽ കാര്യങ്ങൾ ഇപ്പോൾ നടക്കുന്നതെന്നും അദ്ദേഹം വ്യക്തമാക്കി​.