കൊച്ചി: ശ്രീശങ്കരാചാര്യ സംസ്‌കൃത സർവകലാശാലയിലെ ഡിപ്ലോമ കോഴ്സുകളിലെ ക്ലാസുകൾ ആഗസ്റ്റ് എട്ടിനും ബിരുദ ക്ലാസുകൾ സെപ്തംബർ ഒന്നിനും ആരംഭിക്കും. ഡിപ്ലോമ ഇൻ ആയുർവേദ പഞ്ചകർമ്മ ആൻഡ് അന്തർദേശീയ സ്പാ തെറാപ്പി പ്രോഗ്രാമിലേയ്ക്ക് അപേക്ഷിച്ചവർക്കായുള്ള ശാരീരികക്ഷമത പരീക്ഷയും ഇന്റർവ്യൂവും ആഗസ്റ്റ് മൂന്നിന് ഏറ്റുമാനൂർ പ്രാദേശിക കാമ്പസിൽ നടക്കും. ബി.എഫ്.എ പ്രോഗ്രാമിലേയ്ക്ക് അപേക്ഷിച്ചവർക്കുള്ള അഭിരുചി പരീക്ഷയും ബി.എ(സംഗീതം) പ്രോഗ്രാമിലേക്കുള്ള അഭിരുചി പരീക്ഷയും 16,17 തിയതികളിൽ കാലടി മുഖ്യ ക്യാമ്പസിൽ നടക്കും. ബി.എ (ഭരതനാട്യം) പ്രോഗ്രാമിലേയ്ക്കുള്ള അഭിരുചി പരീക്ഷ ആഗസ്റ്റ് 22, 23 തിയതികളിലും ബി.എ (മോഹിനിയാട്ടം) പ്രോഗ്രാമിലേയ്ക്കുള്ള അഭിരുചി പരീക്ഷ ആഗസ്റ്റ് 23, 24 തിയതികളിലും കാലടി മുഖ്യ ക്യാമ്പസിൽ നടത്തും. 29ന് റാങ്ക് ലിസ്റ്റ് പ്രസിദ്ധീകരിക്കും. ബി.എ സംസ്‌കൃതം (സാഹിത്യം, വേദാന്തം, ന്യായം, വ്യാകരണം, ജനറൽ), ബി.എ (സംഗീതം, ഡാൻസ്), ബി.എഫ്.എ പ്രോഗ്രാമുകളിലേയ്ക്കുള്ള ഇന്റർവ്യൂ ആഗസ്റ്റ് 31ന് മുഖ്യ ക്യാമ്പസിൽ നടക്കും. മാർക്ക് ലിസ്റ്റ് അടക്കമുള്ള രേഖകളുടെ പകർപ്പും ഓണലൈൻ അപേക്ഷയും പ്രിന്റൗട്ടും സഹിതം പ്രാദേശിക ക്യാമ്പസുകളിൽ അതത് ഡയറക്ടർമാർക്കും കാലടി മുഖ്യ ക്യാമ്പസിൽ അതത് വകുപ്പ് മേധാവികൾക്കും സമർപ്പിക്കേണ്ട അവസാന തിയതി ആഗസ്റ്റ് ഒൻപതാണെന്ന് സർവകലാശാല അറിയിച്ചു.