കൊച്ചി: കേരള വ്യാപാരി വ്യവസായി ഏകോപനസമിതി സംസ്ഥാന പ്രസിഡന്റായി രാജു അപ്‌സരയെ തിരഞ്ഞെടുത്തു. സമിതിയുടെ സ്ഥാപക നേതാവും 32 വർഷം പ്രസിഡന്റുമായിരുന്ന ടി. നസിറുദ്ദീന്റെ നിര്യാണശേഷമുള്ള ആദ്യ സംസ്ഥാന തിരഞ്ഞെടുപ്പായിരുന്നു. പ്രസിഡന്റ് രാജു അപ്‌സരയുടെ നേതൃത്വത്തിൽ കൂടിയ യോഗം 2022-24 വർഷത്തേയ്ക്കുള്ള സംസ്ഥാന ഭാരവാഹികളെയും പ്രഖ്യാപിച്ചു.

കുഞ്ഞാവു ഹാജി (വർക്കിംഗ് പ്രസിഡന്റ്), ദേവസ്യ മേച്ചേരി (ജനറൽ സെക്രട്ടറി), എം.കെ. തോമസ് കുട്ടി (ട്രഷറർ), പെരിങ്ങാമല രാമചന്ദ്രൻ, പി.സി. ജേക്കബ്, എ.ജെ. ഷാജഹാൻ, അബ്ദുൾ ഹമീദ് (വൈസ് പ്രസിഡന്റുമാർ), കെ.കെ. വാസുദേവൻ, എസ്. ദേവരാജൻ, സണ്ണി പയ്യമ്പിള്ളി, ബാപ്പു ഹാജി (സെക്രട്ടറിമാർ), അഹമ്മദ് ഷരീഫ് (കാസർകോഡ്), വി. സബിൽരാജ് (ആലപ്പുഴ), അഡ്വ. എ.ജെ. റിയാസ് (എറണാകുളം) എന്നിവരെ സെക്രട്ടേറിയറ്റ് അംഗങ്ങളായും തിരഞ്ഞെടുത്തു.

സംസ്ഥാന ജനറൽ സെക്രട്ടറിയായി പ്രവർത്തിച്ചിരുന്ന രാജു അപ്‌സരയും തിരുവനന്തപുരം ജില്ലാ പ്രസിഡന്റ് പെരിങ്ങാമല രാമചന്ദ്രനും തമ്മിലായിരുന്നു മത്സരം. ജില്ലയിലെ സംഘടനാ തിരഞ്ഞെടുപ്പ് പൂർത്തിയാകാത്ത പാലക്കാട് ജില്ലയ്ക്ക് വോട്ടവകാശം ഉണ്ടായിരുന്നില്ല.